Ka Hill Farmers Union (HFU) daw lehkmen ko ya ka sngi ki warep yong ka Meghalaya namo ka Meghalaya Famers Day ha ka 4 tarik u Kmaichonglad (Dec), 2020. Ka lehkmen ha uni u snem u man ko kawa nyngkong dooh neibhah wa ha u snem wa da dep u 2019, ka HFU da pynbna ko ya ka 4 tarik u man ko ka sngi ki warep ka jylla Meghalaya kawa da mynjur leh da u Montri Rangbah ka jylla u Conrad Sangma ha ka Dorbar bah yong ki warep (Meghalaya Farmers Parliament) ha Tura ha ka 9 tarik u Kmaichonglad, 2019.
Katkam ka kyrwoh wa da phah da u Commander Shangpliang, President yong ka HFU seiñbei, da pyntip u wa ka lehkmen u man ko kawa kyrpang wei daw tipmit leh ya ki warep kiwa da yoh khusnam na ka sorkar jylla wei kamjooh leh ya ki warep kiwa da kreh chitom wei kiwa da ye wow kamai jakpoh wei pahooh i yoh i kot du na ka rep ka riang la man ki kiwa dang khynroo lane ki manbei manpa.
Neibynta wow tipmit ya kiwon kiwon kiwa sñiaw wow man ki kam ka nongmuna ha i liang i rep i riang, ye ki wow phone ha u President lane Secretary yong ka Central Body lane ki President wa Secretary yong ki District, ki Block, ki Circle wa ki Unit.
U Commander Shangpliang da pyntip u wa i lehkmen ya kani ka sngi u man ko ha waroh ki District, ki Block, ki Circle wa ki Unit kat kiwa ye wow lehkmen ya kani ka sngi kawa khroo yong ki warep.
Najrong kiwa yahkhmat ha ki District, ki Block, ki Circle wa ki Unit neibynta i tipmit wa kyrpang lane wow yoh Award, ye ki wow Phone ha u Number 8837287374 lane 9366601874 kiwa toh yong u President wa General Secretary ka Central Body.