Ka KSU ha uni u bnai da thoh ko cha u Prime Minister ka ri u Narendra Modi hajrong ki 6 tylli ki phang kitæ wow pynkrehkaam yaka ILP, u pyndam yaka aiñ CCA, u pynlait naka Indo-Nepal Friendship Treaty 1950, u pynbait ya u pood waka Assam, u tipmit yaka ktien Khasi hapoh ka 8th Schedule wei wow booh yaka Central Agricultural University wa pura ha Meghalaya.
Heiyatoh waka ILP da ong wa yaka Manipur da e yaka smat ha u Kmaichonglad (Dec), 2019 katwa yaka Meghalaya, Assam wa Tripura ym poh yoh yaka, wei hapoh ka Meghalaya da dawa yaka nadooh u snem 1985 wei man ko kawa emkaam yow yada yaki jaitbru ka jylla kamjooh deiwa em ko daw wanrah ko yei chongsuk hapoh ka jylla.
Heiyatoh waka CAA da ong wa ka Meghalaya da maad ko yei psiah tooh kiwa na Bangladesh nadooh u snem 1971 hadien ka thma Bangladesh iwa da wanrah leh yei kynaad hapyrdi ki tre chnong wa kiwa psiah chapoh ka jylla.
Da ong leh waka Indo-Nepal Friendship Treaty 1950 toh kawa ya sariem waka CAA kawa chah yaki nong Nepali wow yoh ki wow man kam ki tre ri iwa da wanrah yei boon i ku ki Nepali wei ha ki thaaiñ khappood, ki Nepali da kam ki leh yei thaw yong ki jaitbru ri-loom.
Heiyatoh wa u pood waka Assam uwa jrong kamwa 900Km uwa ym pu em ye u pynbait, da wanrah ko yei mih i awri hadooh wa da dooh yei mynsien bru leh wei i ya kajia da mih i kam ha Langpih, Block I, Block II, Khanduli, Psiar, Moolber, Moojem, Khanapara, Pilangkata, Sabuda, Nongwah-Mawtamur wa kiwi kiwi.
Yaka ktein Khasi da ong toh kawa da sikai ha ki skur nadooh Nursery hadooh ki kyrdan wa heh dooh kawa da tipmit leh daka Calcutta University ha u snem 1900 wei ha u snem 1948 da tipmit yaka daka Guahati University.
Katwa yaka Central Agricultural University won da ong wa ka jylla em ko 75% ki warep, kamtæ emkaam wow em ya kani ka skurbah hapoh ka jylla heiwa hadooh i thaw wow booh yaka leh da em i.