Jowai: U montri rangbah ka jylla, u Conrad Sangma ynne ka sngi da pyntip u wa daw pynman ya ka tamasa Meghalayan Age Festival ha nan Thadlaskein kam chibynta wow pynku ya ka kaam uiñke suwari ha ka jylla.
Da ong u wa kani ka tamasa daw ryngkat ko wa kiwi ki tamasa ka pyrthai (World Class) heiwa daw em ki Hot Air Balloon, i psiah krem, ka Glamping wa kiwi kiwi.
Ya kani ka tamasa kawa 9 sngi u pynman ha ki tayaw wa ar yong u Wisu (March) wei ye ko u sdang ha ka 6-7 tarik.
Ka Glamping (kawa mih na i ktien Glamorous wa Camping) toh ka wow pynman ya ka ha ka sien wa nyngkong hapoh jylla heiwa daw em 50 tylli ki 5 Star Luxury Tent neibynta kiwa wan uiñke wow maad ki kammon man hawa im ha ki thaw 5 star.
Ha kani ka tamasa daw yaleh u pynku ya ki sap wa em ki bru ka jylla, i rukom im, i man i long ka jylla heiwa daw pynyoo ya ki sap kiwa put wa tem, ki chaad tynre wa kiwi kiwi.
Da pyntip u leh wa ha kani ka tamasa daw pynyoo ya ki bru wa ki kaam yong ki ha i rep, i sumaar bru, kiwa yalehke sports, wa kiwi kiwi.
Hawa kylli ya ka poisa wa da mang neibynta kani ka tamasa, u Conrad da pyntip u wa ya kani ka tamasa da khut da ka tender heiwa da wan tap ya ka da kiwa boon ki karkhana kam kiwa da pynman ya ki tamasa heh wei da jied ya kawa khian dooh, katæ toh kawa da paan T. 2.6 klur wow pynman ya ka.
Ynne i janmiet u Conrad da lai pait u leh ya i thaw wa daw pynman ya kani ka tamasa ha Thadlaskein.
Discussion about this post