15 49.0138 8.38624 1 0 4000 1 https://wyrta.com 300 0
Advertisement ad1

Daw paan pynche ka KHADC na ka sorkar hajrong i e NOC wow chna yung

0 Comments
Advertisement ad1
Advertisement ad1
Advertisement ad1

Shillong: Ka Khasi Hills Autonomous District Council (KHADC) da rai ko wow yachem wa ka sorkar jylla wow yoh pynche hajrong i pynbna (Notification) wa da ebor ha ka Council neibynta wow ebor u chna yung neibhah hadooh katni ka KHADC dang kulmar ko ya i rukom ebor neibhah dang em chiboon i duna.

Ya ini i rai ka KHADC da chim ha ka yalang wa da khut da u Executive Member wa pait ya ka Town Committee, u Paul Lyngdoh heiwa da emlang u Deputy Chief Executive Member wa pait ya ka Elaka, u Pyniaid S Syiem wa u EM ka Land, u Titosstarwell Chyne.

Da ong u Paul wa ka yalang da bichaar bniah bha ko hajrong i eh i khoo wa yachem ki paidbah du neidaw wym che i pynbna yong ka sorkar kawa da ong wa kiwa kwah wow yoh bor ye ki wow lai cha ka MUDA namo cha ka District Council.

“Ka KHADC daw yasyllok ko khnang wow tip ya ki thaw wa ka Council ye ko wow e ya ka No Objection Certificate (NOC) neibhah hadooh katni i pynbna wa da e da ka sorkar toh wa ki bru kiwa kwah chna yung ye ki wow paan NOC na Ka KHADC næ na ka MUDA kawa pynkulmar leh ya ki paidbah,” da ong u Paul.

Da ong u leh wa katkam ka Notification ha ka 1 tarik Thohlakhmi (Feb) 2019, ka MUDA da kdaw che ko wa ya ki thaw wa haap hapoh ki ADC, wow ebor u chna yung (Building Permission) u man ki ki ADC, tangwa iwa kulmar toh ka Bye-Laws 2011 u man bait ko thij kam ki Municipal Area wa ki Scheme Area khlem klam iyi iyi leh hajrong ki thaw wa haap hapoh ki ADC.

U Paul da ong u leh wa daw rah u ya ini i rai ka Executive Committee wow yachem lang wa ka sorkar wow ye u pynbait noh ya ini i kaam wa da sah kattu la kamwa le snem.

Advertisement ad1

0 Comments

Leave a Reply