U Montri Rangbah ka jylla, u Conrad K Sangma ym em kular u wa ka sorkar MDA daw ye ko wow pynbait noh ya u pood u ang wa ka jylla Assam, tangwa daw thooh ya ki laad ki luti wow pyrchang, neibhah wa kani ka phang man ko kawa eh, kawa da slem wa kawa kyllaaiñ.
Hawa jubab ya ka Special Motion hapoh ka yung dorbar ha ka sngi wa 5 yong ka Dorbar Synrai, u Conrad da ong u wa i chna ya ka Committee wa 5 ngut ym mut wow em bait du 5 ngut, tangwa daw pdiang leh yei e yumut yong waroh kiwa embynta wa kiwa yahkhmat chnong.
Da pyntip u wa ha i yachem wa arsien hapyrdi ki Montri Rangbah yong ka jylla Meghalaya wa Assam, da mynjur ki wa em 12 tylli ki thaw wa ya kajia, wei i yaklam da man bait ya kitai ki thaw, heiwa u sdang chwa na ki 6 tylli ki thaw wa rap duna i ya kajia.
Da ong u wa ka sorkar MDA da chim ko ya ki kot ki sla wa da pynkhreh da ki sorkar kiwa da lai, deiwa pynsñiaw wa da myntoi bha ki kot ki sla wa da em chwa. Tangwa da ong u leh wa man ko iwa eh leh wow kam ya ki thaw du da ki kot ki sla wa da em neibhah ka Assam leh ka em ko ya ki kot ki sla yong ki hi yow kam ya i thaw, wei da pynrap u wa iwa eh katni toh u tip ki yong ki kot ki sla wa toh.
U Conrad da ong chooh chooh u wa katni hap wow pait yei long i man wa i rukom im ha ki khappood, wa i sñiaw ki paidbah wa ki bor synchaar, da ong u leh wa ka sorkar ym khwan ko wow kam wa daw ye ko u pynbait, tangwa daw yaleh ko wow pynbait neibhah ki bru kiwa sah ha khappood da im ki hei syier wei katni toh wow thooh ya ki laad.
Hajrong i klam u Montri Rangbah ka Assam, u Himanta Biswa Sarma wa ka Meghalaya da kam ko ya ki thaw, u Conrad da ong u wa ym tip ileh wa u Sarma da klam u ya kitai ki kyntien, tangwa da ong u wa ye u man wa iwa mut u Sarma toh neidaw wa waroh ki jylla hapoh ka North East da ah ya ki na ka Assam nadooh wa sdang.
Ha i jooh i por u Montri Rangbah da ong u leh wa ym ye wow kyntait wa da em chiboon i jia ha khappood, heiwa da ong u wa da em i pyrchang wow pynbait smat nadooh ki Block Officer ter ter chadooh ka kyrdan u Chief Secretary, deiwa pynrap wa ka sorkar hawa yoh yutip wa em iwon iwon i jia du wa yoh yutip da yaklam wut wut wa ka sorkar Assam, heiwa da pyntip u leh wa na waroh arliang da ya kyntu ki yow lait na iwon iwon i jia katwa dang lai ka yaklam.
Hachwa ya ini hawa wanrah ya ka Special Motion, neiliang ki MLA ka Congress, u Hima Shangpliang da kylli u iyi mut itæ ya e ya chim mar kylliang (Give and Take) yei thaw, deiwa pynsñiaw wa i pyrchah ya ini i thmu deiwa ong wa ki thaw wa man ki yong ka Meghalaya ym toh u lai ki cha ka ka Assam wei ya kiwa da dep bam ka Assam da toh wow pynyoh biang cha ka Meghalaya.
Neiliang u MLA ka Nongpoh, u Mayralborn Syiem da ong u wa ka sorkar toh u phah takit ko hajrong i tyngkheiñ ya ka Land Transfer Act, neibhah wa em ki bru hadooh katni kiwa dai pathar ya ki thaw ha khappood.
U MLA ka Umroi, u George B Lyngdoh da kylli u ya ka sorkar hajrong i phah pyrton ka Assam hadooh 4000 ngut ha ki thaw khappood, wei kamjooh yei kam yong ka Assam wa ym em i yakajia khappood wa ka Meghalaya, tangwa toh ka Meghalaya kawa kam ya ki thaw yong ka Assam.
Neiliang uwa yahkhmat ka Liang Pyrchah uwa man leh u Montri Rangbah warim ka jylla, u Dr. Mukul Sangma da ong u wa ki MLA ka Liang Pyrchah da kyrchaan ki ya ka sorkar hajrong i thmu wow pynbait ya u pood u ang lada ka sorkar ka leh ko ha i rukom wa toh.
Kiwi kiwa da klam hajrong kani ka phang toh u Kimfa S Marbaniang, u Zenith Sangma, u Sosthenes Sohtun, u PT Sawkmie, u Esmatur SG Mominin, ka Ampareen Lyngdoh, u Adelbert Nongrum wa u Rakkam A Sangma.
