U CEM ka JHADC, u Thombor Shiwat da kubur u wa dang em hi i duna ha ka Mang Tangka ka Council deiwa ong ymye u pynhun ya waroh ki MDC neibhah lada em i duna ha kawi daw kdaw, lada pynboon won ha kawi ka chnat leh daw kdaw wei itæ toh i kaamram yong ki.
Da khana u wa ya ka Fund Rules da pynkhreh ya ka da ki bru chemphang wei ym kreh wow leh jhan ya ka heiwa daw wanrah ya ka haka dorbar wow wan deiwa pynrap wa ka AD Rules leh da man kiwa da rim wei da phah ya ka cha ka sorkar wow yoh yei mynjur na ka.
Chooh chooh da pynche u wa i wiar ki Weighbridge toh neidaw wym em de krehkaam ki wei ka poisa wa khaddooh wa yoh na ki leh toh ha u snem 2024-25 heiwa da khana u wa em hi ka Fixed Deposit ka Council wei da em ki MDC kiwa da tyrwa wow sai poisa na ka tangwa neiliang yong oo da ong u yang hadooh wa kut ko itæ ha ka 06-06-27.
Heiyatoh wa ka Digitalization of Forest da ong u wa daw pynkrehkaam ya ka wei daw pait kammon man ko.
U Thombor da pyntip u wa ka General Department da booh ko Rs. 20 lak wow thied ya ka truck wow kit jhep na Iawmusiang wa na Iawthymme, weiwa ka Political Department da booh bhah ko ya ka poisa wow pynman yei jied Dolloi noh ha Elaka Sutnga, Rymbai wa Sumer.
Heijooh i por da khana u wa ka Land Revenue and Land Settlement man ko kawa suki wei tlot dooh u krehkaam wei manda takit ka EC da chem wa e daw kiwa kreh wym yoh tulop kamjooh leh wym yoh ya ka bai luti namo ka Travelling Allowances heiwa da rai wow pynheh i su ya ki khnang wow lai bait i kaam wei daw pait chi snem kammon man ka chnat.
Heiyatoh wa ka Stationary Department da ong u wa emkaam u thied ya ki kor Xerox Machine, ki Printer, Computer wa kiwi.
U Thombor da khana u leh wa heiyatoh wa ka chnat Education da pynman yei sylli bniah heiwa da chem wa em ki skur wym em de man ki katkam ki kyndon sorkar wow em kawi kawa sikai ya ki 30 ngut ki khynnah, tangwa em ki skur ka District Council wa em 5 ngut kiwa sikai ya ki 3 ngut ki khynnah wei em won wa em 2 ngut kiwa sikai neibynta 300 ngut ki khynnah heiwa ka Council da rai ko wow pyndam noh ya ki kattu katni skur wei ya kiwa sikai daw phah ya ki chawi won.
Heiyatoh wa i booh bhah ya ka Entertainment, u Thombor da ong u wa nachwa ki MDC ka Liang Synchaar jooh sai bai cha ki tangwa katni ym em de u sai ya ka poisa.
Kamjooh leh da kdaw u wa i tlot ka chnat Fisheries toh neidaw wym bien de ki bru u thied ya ki wah wei em leh ki por wa ki MDC hi wa paan duna dor ya kiwa thied wah neidaw wa toh ki bru yong ki.
Da khana u leh wa katni da rap pynku poisa ha ka Calendar neibhah wa da man ki kiwa miat wei da sñiaw sarong wow e ya ki cha kiwi ki District leh.
Chooh chooh da khana u wa ya ka Website da yaklam wa ka NIC wow pynmiat ya ka neibhah wa da man ko kawa da rim kawa ka 10 snem kattu khlem pynthymme ya ka.
Da pyntip u leh wa da booh bhah ya ka poisa wow sikai kammon u pynemkaam ya ki dak thoh Jaiñtia, kammon u phah ya ki cha ki skur, kammon u pynkrehkaam ya ka khnang wow ye u yada ya ka jaitbru Jaiñtia.
Discussion about this post