U Executive Member ka KHADC uwa pait yei khooid i suba, u Teiborlang Pathaw da ong u wa ka Council daw sdang noh ko wow pynkhooid hi noh yei jhep hadien wa da wanrah ya ka KHAD (Solid Waste Management) Act, 2020.
Da ong u wa ya ka Solid Waste Management Committee yong ki chnong da tipmit da ka District Council wei lyngba kani daw em ki Project kamwa da yoh na ka sorkar pyrdi lyngba ka 15th Finance Commission kawa yatoh waka Health & Sanitation.
Da pyntip u wa ya ka Project daw pynbna nyngkong ha u Khonchonglad (Nov) uni u snem wei daw sdang na ka chnong Mawlai Mawroh kawa da e 4000 Sqft i thaw wow booh ya ka Resource Recovery Center yow pynkhooid jhep wa mih na katai ka chnong.
U Teibor da pyntip u wa i jhep i jakhlia kiwa mih u lait bait ki cha ka RRC heiwa daw jied ya ki jait jhep.
Da ong u leh wa ka KHADC daw lai ko cha ki paidbah yow pyntip wei pynsñiawthooh yow pynmankaam yeini wei khamtam yow pynkhlaad chwa yei jhep nadooh na yung hapyrdi ki jhep wa pyut wa ki jhep wym pyut wei lada emkaam leh yei thaw pynlang jhep daw leh katkam ka juk stat wa katni ym toh kamwa da leh ha Marten.
Da khana u leh wa yei jhep daw yaleh wow pynkhooid du hapoh ar sngi wei lada hoi wow pynmih sboh næ wow pynmih bordiñ daw pynemkaam da iwi i rukom.
Discussion about this post