New Delhi: Ya ka National Register of Citizens (NRC) daw pynkrehkaam ya ka ha waroh kawi ka ri da ong u montri ka sorkar pyrdi wa pait ya ka kaam pohyung, u Amit Shah ha Rajya Sabha wei ki bru kiwa na kawon kawon ka niam ymtoh u tieñ ki.
Da jubab u deiwa ong wa i pynkrehkaam ya ka NRC da pait bniah da ka Supreme Court wei ym em u ñiawchiliang ya kawon kawon ka niam, wei yeini i jubab da e u yeiwa kylli u MP ka Congress u Syed Nasir Hussain. Uni u MP da kylli u leh lada ka NRC pynman tre ri ko ya ki baar ri kiwa na ki 6 niam lait na ka niam Muslim.
U Shah da ong u wa ka NRC wa ka The Citizenship Amendment Bill 2016, kawa da yap ha ka 3 Naiynru, 2019, yaphær ki wei ymtoh u kheiñlang ya ki chirup.
Da ong u leh wa ki bru ki wym em u mih pyrtuid ha ka NRC ye ki wow yakhun ha ki Tribunal ha jar jiar ki thaw yong ki. Ka sorkar Assam daw e yarap poisa ko leh ya kiwa dooh wow yakhun ki ha kini ki Tribunal wei ka sorkar wow pynlut neibynta ka bai muktiar ki.
Ka NRC wa khaddooh, da kyntait ko chadien ya ki 19 lak ngut ha Assam wei boon na ki kiwa ymbiang ki kot ki sla ye ki wow lai ujor cha ka Foreigners’ Tribunals wa kiwi ki yung kasari.
Ha Assam, ka thong yong ka NRC toh wow pait ya ki wymtoh ki tre ri kiwa da psiah hapoh jylla nadooh u Wisu (March) 25, 1971.
Discussion about this post