Hawa pynlait ya ka Election Manifesto ka BJP neibynta ka Assembly Election ka Jammu and Kashmir, neiliang u Home Minister, u Amit Shah da ong u wym emlaad de wow pynim biang ya ka Article 370, kawa e Special Status ya ka jylla Jammu and Kashmir nachwa heiwa da ong u wa kani ka Article 370 toh ka wow kynmoo yongrim donhi kattu.
Ya ka Article 370 da pyndooh pyndam ha u snem 2019, tangwa ha ka Manifesto wa pynlait da ka National Conference kawa daw yaleh ya kani ka Election deiwa ya krehlang waka Congress, da ong ki wa daw pynim biang ya kani ka Article 370.
Kani ka Election MLA u pynman hei sien wa nyngkong nadooh u snem 2014 wei man ko leh kam ka laad wow pynyoo kammon sñiaw ki bru ka Jammu and Kashmir yei chah pyndam ya kani ka Article 370.
Ka Jammu and Kashmir katni toh kawa da phiah ha ki ar tylli ki Union Territory wa kynthup ya ka Ladakh ha u snem 2019 tangwa ka sorkar pyrdi da kular ko wa daw e biang ya ka J&K wow man ko kam ka jylla wa pura.
U Shah da lai u cha Jammu and Kashmir neibynta ka ar sngi heiwa da ong u wa hadooh u snem 2014 ki bru wa kwah wow yaleh laitlooid wei ki Terrorist toh kiwa da em ha Jammu and Kashmir kiwa da yaleh katwa ye yow pynthut yei suk i saaiñ tangwa manda thoh yei parom ka J&K nadooh u 2014 hadooh u 2024 daw thoh da ki dak ksiar.
Da ong u leh wa heipor wa em ka Article 370, ki sorkar da hap bait ki wow pyndem ha kini ki bru wa yaleh pyrchah kamjooh ki seiñ wa boon tangwa kattu ka Article 370 wa 35-A kiwa jooh e bor ya ka sorkar jylla wow ong kiwon kiwa chong chnong wa pura da wiar noh ki napoh ka Constitution.
Ka Election ha Jammu and Kashmir daw pynman ha ka le bhah (Phase) i thap Vote kawa daw sdang ha ka 18 tarik uni u bnai hadooh ka chi tarik u Naichiphaw katwa ya ka Vote u niaw ha ka 8 tarik u Naichiphaw hi.
Discussion about this post