Shillong: Ka Meghalaya Pradesh Congress Committee (MPCC) da rai ko wow pynman da ki yakhih hapoh ka jylla kam i ya chimbynta wa ka All India Congress Committee (AICC) kawa daw pyrchah ha waroh kawi ka ri India hajrong i mynjur yabor ya ka Farm Bill da ka sorkar National Democratic Alliance (NDA) wa yahkhmat da ka BJP.
U MLA ka Rangsakona uwa man leh uwa e ktien ka Congress ha ka jylla, u Zenith Sangma da ong u wa ini i yakhih yong ka Party ha ka jylla wa ka ri waroh kawi toh wow dawa na ka sorkar pyrdi wow bichaar biang chwa ya ka Farm Bill, wei toh u rah chwa leh ya katai ka Bill ha ka Parliamentary Standing Committee wa ka Select Committee yong ka Parliament wow paan ya i sñiaw yong ki paidbah.
Da ong u wa ka sorkar NDA kawa em ya i boon paaid ha Parliament da mynjur yabor ko ya kani ka Bill khlem da ya phyllu yumut wa kiwa yahkhmat ki warep næ wa ki MP yong ka liang pyrchah iwa man pyrchah ya i sñiaw ki paidbah.
Uwa yahkhmat ka Congress da ong u wa ki warep ha ka ri waroh kawi ym yoh de ki yei myntoi lada pynkrehkaam ya katai ka aiñ, neibhah wa ym yoh de ya i dor wa biang ha i por wa yap ka yaw lyngba ka Minimum Support Price (MSP) neibhah wa katai ka aiñ da pyndooh ko leh ya ka Agricultural Produce Marketing Committee (APMC) Act.
Da ong u wa i wanrah ya katai ka Bill, ki warep daw hap ki wow chaniah ya ki mar wow dai da i dor wa da booh da ki mahajon heh, neibhah chisien wa da pyndooh ya ka APMC Act, ki warep ym ye de ki wow pynlai yaw ya ki mar rep cha ki Mandis næ ki thaw wa pait da ki warep wow pynlai yaw ya ki mar.
Da ong leh wa ka Congress ka dawa ko na ka sorkar wa toh u booh ya ka Minimum Support Price ha katai ka Bill.
Neiliang u Kennedy C Khyriem da ong u wa ka Agricultural Produce Marketing Committee (APMC) Act, toh ka aiñ wow yada ya ki warep na i chah thombor næ chah yoohbeiñ ha ki mahajon kiwa heh heiwa i dor i mur leh toh wa ka sorkar wow booh khnang wa ki warep ym doohnong ki, tangwa da i wanrah yong ka sorkar ya kani ka Bill da pyndooh noh ya i hok ki warep neibhah da pyndam noh ya ka MSP, kamtæ ki warep daw hap ki wow dai bait ya ki mar cha ki mahajon kiwa heh ha i dor wa booh ki mahajon.
Hawa kylli hajrong i pdiang yong u Montri Rangbah ka Meghalaya ya kani ka Bill, wa ym ktah ko ya ki warep ka jylla, u Zenith da ong u wa kattæ ye ko wym ktah tangwa i ktah daw wan ko neibhah kamwa man, ki warep toh ki budloom yong ka ri waroh kawi. Da ong u boi u Conrad Sangma ym em puræ u ya kani ka Bill lane wa kwah wow em ha ka thup kam u khon tipsngi yong u Montri Rangbahdooh u Narendra Modi.
U Kennedy da ong u wa ye wow man wa kani ka Bill ym pu ktah ko ya ki warep ha kani ka jylla, tangwa kamwa da paw hadooh katni, ki mar rep na ka jylla ym pu ye u pynbiang ya iwa emkaam wei hap wow wanrah boon na baar ka jylla, wei lada ktah cha kiwi ki bynta ka ri India daw ktah lang leh ya kani ka jylla.
Katkam wa pyntip uwa yahkhmat ka Congress wa i yakhih yong ka Party daw sdang nadooh u ka 2 tarik u Naichiphaw da ka Kisan Mazdoor Bachao Diwas, heiwa daw pynman da ki Dharna wa ki lai pyrchah wa jai jai ha waroh ki District Headquarter, ha ka 10 tarik u Naichiphaw won daka Kisan Sammelan daw pynman yaka yakhih ha ki nongbah yong waroh ki jylla.
U Zennith da pyntip u leh wa ha ini i yakhih daw rah leh ya soi pyrtuid ki yong 2 klur ngut ki warep deilang wa i dawa wow bichaar biang ya katai ka Bill kawa daw ekti cha u President yong ka ri India ha ka 14 tarik u Naichiphaw.
