Jowai: U Montri Rangbah ka jylla u Conrad K Sangma da pyntip u wa daw pynman ya ka yalang yonglang hapyrdi tnat puræ puthi, ka tnat muna poisa ha kani ka tayaw wow wan yow thooh kammon wow pyllait ya ka tulop wa sah yong ki 12,000 ngut kiwa sikai SSA hapoh ka jylla.
Yeini i kular u Conrad da e u hadien wa lai yachem ki dkhot ka Meghalaya Sarva Shiksha Abhiyan Schools Association (MSSASA) ya oo ynnin ka 15 tarik.
Ka MSSASA da e dorkhat ko leh ha u Conrad wow dawa pyllait ya ka tulop wa 8 bnai yong u snem mang tyngka 2016-17 wei 5 bnai ka tulop nadooh u bnai Khonchonglaad 2017 hadooh Wisu 2018.
U President ka MSSASA u A. Rymbai, da ong u wa i wym biang i rukom phah poisa ka yong ka Sarva Shiksha Abhiyan cha ka jylla Meghalaya da ka Ministry of Human Resources Development ha kini ki ar snem da warah ko i chitom wa boon ya kiwa sikai.
Ha u snem 2016-17 ka Project Approval Board (PAB) Ministry of Human Resources Development da mynjur ko ya ka mang poisa wa T. 45124.44 lak wow pynkrehkaam ya ka SSA.
Na kani, T. 21365.90 lakh da yoh ka State Implementing Society (SIS) Sarva Shiksha Abhiyan State Education Mission Authority Meghalaya (SSA-SEMAM) ha ka 31-03-17 kawa da pyntikna leh da ka Finance Department ha ka 05-04-17.
Kamtæ da duna poisa T. 23758.54 lakh kawa toh u su kam ka Arrear wa T. 8951.39 lakh yong ki 12481 kiwa sikai SSA.
Discussion about this post