Ynne ka sngi ha ka dorbar mang tangka ka sorkar jylla, da yaklam yillu hajrong i pynjanai ya ki thaw sumaar hapoh ka jylla heiwa neiliang u Montri ka jylla, u Lahkmen Rymbui da ong u wa ka sorkar da tyrwa ko wow pynmiat noh ya ki 336 tylli ki thaw sumaar ha kylleiñ ka jylla.
U Lahkmen da ong u wow ye u pynbiang yeini daw emkaam ya ka poisa na ka Meghalaya Health System Trading Project kawa man ka poisa yarap (Externally Aided Project) na ka World Bank, na ka National Health Mission, Prime Minister Ayushman Bharat Health Infrastructure Mission, ka 15th Finance Commission wa ka poisa na ka jylla.
Hajrong ini neiliang ka MLA na East Shillong, ka Ampareen Lyngdoh da wanrah ko ya ka phang wow pynku kyrdan noh ya ka Urban Public Health Centre (UPHC) ha Demseiniong deiwa ong wa kani ka thaw e sumaar ko boonjait ya ki bru tangwa ym em de u pynku kyrdan ya ka heiwa da em ki thaw hajan wow leh yeini wei nadooh u 2018 da dep wow pyrchang wow leh yeini.
U MLA ka Mawsynram, u Himalaya Shangpliang da kyntu u ya ka sorkar wow pynku kyrdan noh ya ka PHC ha Dangar cha ka CHC khnang wow suk ki paidbah ka thaaiñ khappood yow lait ki u lai cha Shillong wow chah sumaar.
