15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Daw pynpoi ya ki rel Metro ha ki 25 tylli ki sor ka ri ha u 2025: Modi

Advertisement ad1

U Prime Minister ka ri u Narendra Modi ynne ka sngi da wai paidbah u yaka rel wym emkaam wa yah wa nyngkong dooh hapoh ka ri kawa lai luti ha ka Delhi Metro Magenta Line kawa da chimbynta u Modi lyngba ka Video Conference.

Ynne ka sngi yaka National Common Mobility Card da pynyaar chooh chooh yei krehkaam yong ka sa ha ka Airport Express Line ka Delhi Metro, kawa da sdang ha Ahmedabad ynnin u snem. Da emlang leh u Union Minister u Hardeep Puri wa u Chief Minister ka Delhi u Arvind Kejriwal ha ini i wai paidbah.

U Prime Minister da ong u wa ynne ka sngi man ko kam chibynta wow pyntikna wa ki thaw wa cha sor toh kiwa da pynkhreh ya ka mynried. Da ong u leh wa ha ki phaw snem wa nachwa ym em chimkhia yeiwa emkaam ki thaw wa cha sor wei ki kaam wa leh leh toh kiwa leh tangdep wei kiwa yoo kulmar. Kamtæ da ong u wa i pyrkhat deiwa thymme katkam ka juk wa katni ym toh wow kheiñ kam u moochynthut tangwa ka kabu wow chna yeiwa emkaam hapoh ka ri iwa daw pynsuk yei im ki bru.

Da kdaw u wa ha u 2014, du 5 tylli ki sor wa em ya ki rel Metro, tangwa katni da em ki ha ki 18 tylli ki sor. Ha u snem 2025 da ong u wa daw pynpoi ya kini ha ki 25 tylli ki sor.

Da ong u leh wa ha u 2014 da em du 248 Km ki luti rel Metro wei katni da ku ko le chah deiwa em palat 700 Km. Ha u snem 2025 daw pynku cha ka 1700 Km.

Da khana u leh hajrong kiwa boon ki jait rel kam ka Regional Rapid Transit System (RRTS) hapyrdi ka Delhi wa Meerut, deiwa pyntip wa ini daw pynjan ko yaka Delhi wa Meerut du hapoh chi kynta donhi. Da khana u leh wa ha ki thaw wa duna ki bru, daw booh da ki MetroLite kiwa daw lut u chna 40% na iwa jooh. Chooh da khana u leh wa ki Metro Neo da pynkreh ha ki sor wa duna ki bru wa pynemkaam ya ki Metro wei i lut wow chna ya kini toh 25% na iwa jooh. Da khana u leh wa da em i pyrkhat wow booh da ki Water Metro ha ki thaw wa em boon ki um kam wow pynyabi ya kawi ka dawlynnong wa kawi.

U Modi da ong u leh wa ki rel Metro ym man ki du kam ki laad lai luti, kamjooh leh pynduna ki yei tngit ka la-ær kamjooh pynduna ki yei sakhut kari.

Da ong u leh wa deiwa chna ya ki Metro pyn hapoh ka ri da pynyohkreh leh ya ki bru wei da pynduna yei lut wow chna ya kawi kawi ka daba namo ka Coach naka T. 12 klur cha ka T. 8 klur katni.

Share this:
Previous

Le sngi u neh u khlieh ka Indian Army ha Republic of Korea wow pynkhlan yei yalok ki ar ri

Next

Sdang ki pulit wow sylli yei yah kari deiwa muaid ha Shillong