Shillong: U General Secretary ka AICC wa pait ya ka jylla Meghalaya, u CP Joshi da ong u wa i yut seiñ ki MLA na ka Congress wow psiah cha kiwi tawon ki seiñ ym em man i iwa thymme neibhah wa da jan ka Election.
Hawa yaklam wa kiwa pathai khubor hadien ka yalang yong ka MPCC ha Congress Bhavan, u Joshi da ong u wa ki MLA em ki jar jiar ka thong chwa ka Election wei wow pynmankaam yei thmu yong ki.
Hawa jubab yeiwa kylli wa ka Congress chem chitom ko ha ka election nei mih ki kattu katni ngut ki MLA, da ong u wa daw pait heipor wa da pynbna ya ka Result yong ka MLA Election ka wow paw lada chah ktah sakhiat ka party.
Da pynbaad u leh wa ka i pynbna ka BJP wa daw em chooh ki MLA ki wow mih noh na ka party ha ki sngi wow wan toh du yow pynkhih ya ka Congress.
Da kop u leh wa ka Congress daw wan biang ko heibor ha u 2018 hadien wa da yoh wow yaphyllu wa kiwa kyrchaan ka party ynne ka sngi.
U Joshi da ong u wa ka BJP kular thok hi-eh ko ya ki paidbah wa lada wan ko heibor ha ka jylla daw pyndam noh ko ya i khang tih mooyong ka NGT du hapoh 7 bnai, deiwa ong leh wa ini i kular thok ka BJP ym ye ki wow pynbiej ya ki paidbah ka jylla.
Neiliang u Montri Rangbah, u Dr. Mukul Sangma da ong u wa wot ki MLA wa katni ha ka party leh ympu tikna lada daw yoh ki namo ym yoh u yaleh na ka party.
Da ong u leh wa ha ki por wa da dep ka party da kyntait ko wow e ticket ya ki MLA neibhah ka party haap bichaar chwa ko chwa wow e ticket hanlada man u u MLA ka party.
Chooh chooh da ong u Dr. Mukul wa ka party daw pyntikna ko wa waroh kiwa yut na ka party daw chah pynrem lut ki neibhah wa man ki ki bru kiwa kwah u yoh myntoi samen donhi.
Discussion about this post