New Delhi: U montri ka kaam pohyung ka ri, u Amit Shah da ong u wa daw thooh ya ki baar ri kiwa sah tooh hapoh India wei daw pynuiñ lut ya ki cha jar jiar ki ri yong ki.
Ka sorkar pyrdi da booh ko kattu katni ki rukom krehkaam wow thooh ya ki baar ri kiwa sah tooh hapoh India wei wow khanglaad ya kiwa na baar wow psiah tooh ki chapoh ka ri wei kini ki kaam kynthup ki wow kær naar-chieh, i booh ya ki chipai ha khappood, wa kiwi kiwi.
U montri khynnah ya ki kaam pohyung, u Nityanand Rai ynne da ong u ha Rajya Sabha wa ka National Register of Citizens (NRC) ha Assam daw pynmih ya ka katkam ka hukum ka Supreme Court.
Hajrong won ka Citizenship (Amendment) Bill, 2016 kawa da pdiang ha Lok Sabha warim kawa da man leh kawa da yap, da phah ya ka cha ka Joint Parliamentary Committee wow puræ ya kani ka aiñ heiwa da ekti ko ya ka bui hajrong ini i puræ ha u Duyatra uni u snem chwa wow yoh yaka sorkar wa thymme.
Da ong u leh wa ka Citizenship (Amendment) Bill, 2019 kawa da pdiang da ka Lok Sabha ha ka 8 Duyatra da yang ya ka wow pdiang sa da ka Rajya Sabha chwa wow kut ka samoi yong ka 16th Lok Sabha, tangwa kani ka Bill da kut por noh ko.
Da ong chooh chooh u wa ka Citizenship (Amendment) Bill, 2019 toh wow pynman tre ri ya ki 6 tylli ki jaitbru khian paaid na Pakistan, Afghanistan wa Bangladesh khlem emkaam kot emkaam sla.
Katkam wa man ka aiñ Citizenship Act, 1955 ki bru na kini ki jaitbru khian paaid man ki kiwa sah tooh hapoh ka ri tangwa ka Gazette Notification wa pynmih ha ka 24 Naichiphaw, 2018, hapoh ka Section 16 yong ka Citizenship Act, 1955 ebor ko ya ki bru na kini ki jaitbru wow man tre ri lada pdiang ki ya ki kattu katni tylli ki kyndon wei kani ka Notification ym em hiwot pynkylla ko ya ka The Citizenship Act, 1955.
Discussion about this post