Shillong: U MDC na Mylliem, u Ronnie V Lyngdoh da ong u wa lada pynkrehkaam yaka Environment Impact Assessment (EIA) wa da pynthymme, daw pynyap noh ko yei daw wa em ki Autonomous District Council, heiwa da e yumut u wa ka KHADC da toh u dawa ko na ka sorkar India wow pynlait ya ka EIA na u pood u ang yong ka Council wei toh u pyrchah bait ya katai ka aiñ. U Ronnie da ong u ya ini hawa chimbynta ha ka kynta kylli wei jubab ha ka dorbar KHADC ynne ka sngi.
Ha chwa ya ini, neiliang ka Executive Member wa pait ya ki kaam khloo ka Macdalyn S Mawlong da pyntip ko wa ka Khasi Hills Autonomous District Council (KHADC) da chimkhia ko hawa yatoh wa i thmu yong ka sorkar India wow pynkrehkaam ya ka Environmental Impact Assessment (EIA) ha ka jylla, wei da pyntip ko wa ka Council da dep ko wow thoh cha ka Ministry of Environment, Forest and Climate Change deiwa phah leh ya 12 tylli ki phang wow pynyinsur ya i pynkrehkaam ya ka EIA hapoh u pood u ang ka Council. Ka EM da pyntip ko ya ini hawa jubab ya iwa da kylli iwa da wanrah da uwa yahkhmat ka liang yatai u Lamphrang Blah.
Katkam wa pyntip ka Macdalyn, ki pynsñiaw yong ka Council cha ka Ministry toh yow e laad ya iwa pynsñiaw yong ki paidbah kiwa pyrchah ya ka EIA naka 20 sngi cha ka 30 sngi yow pyndep ya i pynsñiaw ki paidbah cha ka 40-45 sngi, wa i mantre ya i khyndaw i chyiap ym toh u chah ktah i, heiwa ym chah wow tih ya ki marpoh khyndaw khlem da leh ya ka Environmental Clearance, lada emkaam wow chim ya i khyndaw i chyiap toh wow yoh bor na ka District Council, toh u emlang ki bru yong ka Council hawa pynkhreh ya ka EIA wa kiwi ki pyrchah kiwa ye u ktah.
