U Montri Rangbah ka jylla Meghalaya, u Conrad K Sangma da klam skem u cha ki seiñbhalang wa ymye de wow kyruiñ-dien cha ka soskular næ ka Memorandum of Understanding (MoU) wa da soi ki ar jylla heiyatoh wa i pynbait ya ki khappood ka Meghalaya wa Assam ha ka kylla wa nyngkong. Tangwa da ong u wa ka sorkar daw pyrchang ko wow yaklam biang wa ka sorkar Assam katwa dang lai i yaklam ki ar jylla ha ka kylla wa ar.
Neiliang ki seiñbhalang wa kynthup ya ka KSU, FKJGP, ADE wa kiwi kiwi, ynne ka sngi da yachem biang ki ya u Montri Rangbah kamjooh wa u Symbood Montri Rangbah wow pynsñiaw yei wym hun hajrong i ieh noh ya ki thaw cha ka Assam hawa pynbait ya u pood u ang yong ki 6 tylli ki thaw ha ka kylla wa nyngkong.
Hadien ka yalang, u Conrad da ong u wa da pynche wei da batai bniah u cha ki seiñ heiwa da pynyoo u leh ya ka bui wa da pynkhreh ha u snem 2011, kawa da batai wa ki chnong wa ki seiñbhalang kwah ki wow em cha Meghalaya da chah kyntait chwa ki ha kani ka bui. Da ong u wa man iwa eh ya ka sorkar katni wow pynkylla ya iwa da em ha ka bui yong u snem 2011.
Da ong u wa ki seiñbhalang da sñiawthooh ki yei eh i khor wa chem ka sorkar, wei kammon emkaam wow lai chaphrang i kaam, tangwa ki seiñbhalang dang pynsñiaw hi ki yei sñiawkhia hajrong i kwah yong kiwa chong chnong wow em ha Meghalaya, wei da kyntu ki ya ka sorkar wow pyrchang yaklam biang wow kynthup biang ya kini ki thaw hapoh ka Meghalaya.
