Shillong: U Chief Secretary ka jylla, u MS Rao uwa man u Chairman yong ka Joint Committee wa da thung da ka sorkar wow bichaar biang ya ki kyndon (SOP) neibynta wow wai biang ya ki thaw mane Blai ha ka jylla, da pyntip u wa i pynbait ya ki kyndon næ ki Standard Operating Procedures (SOPs) daw rai biang ha ka yalang wow pynman ha kani ka tayaw.
Hawa klam wa ki laad pathai khubor hadien ka yalang wa nyngkong wa ki dkhot ka Shillong All Faith Forum (SAFF), u Rao da ong u wa da ya phyllu yumut bha hawa yatoh wa ki SOP kiwa da pynbna da ka sorkar rap nachwa, wei katkam i pyntip u CS, ka Forum da pynyoo ko ya ki kattu katni kiwa emkaam wow pynbait wa malu mala ha ki kyndon, ya kiwa ka sorkar daw bichaar bniah biang ko.
Da ong wa ha kini ki 2 næ 3 sngi wow wan daw yachem biang, wei daw chim ya ka rai wa khaddooh ha kani ka tayaw neibynta wow wai noh ya ki thaw mane Blai ha ka jylla.
Hawa kylli, lada daw ye wow wai yaki yungmane ha ka jylla, da ong u wa haka yalang wa nachwa wa da khut da u Montri Rangbah u Conrad K Sangma, da dep wow pynbna wa daw ye u wai ha ka tayaw wa nyngkong u Naichiphaw lada i long i man na ka khlam COVID-19 u rap bha ko ha ka jylla, deiwa pynrap wa ini man ko katkam i antaad wow yoh u wai noh.
Hawa kylli hajrong i rai yong ka Khasi Jaintia Presbyterian Assembly (KJPA) wow wai ya ki yungmane nadooh ka 1 tarik u Naichiphaw khlem da yoh bor naka sorkar, u Rao da ong u wa ym pu yoh yutip ya kam itæ i rai, tangwa da pynsñiaw u wa kiwa yahkhmat yong kiwon kiwon ki Niam u kohngooh ki katkam wa phah wa i rai na ka sorkar.
