U MLA warim ka Mawsynram, u Himalaya M Shangpliang uwa dang thep thung kam uwa e buit ka chnat puræ puthi da pyntip u wa i e ya ki Vocational Skill Training heipor wa dang lai skur u man ko kam chibynta wow pynkylla ya ka Education Policy ka jylla Meghalaya.
Da ong u wa deiwa sdang da kini ki e sikai daw yarap ko ya ki khynnah wow pynkhreh nadooh na skur ki sap kiwa daw yarap ya ki manda lai thooh kreh ki.
Ya kini da booh thong ka sorkar wow sdang ya kitu kiwa lai puræ nadooh Class-VIII hadooh Class-XII wei da yooluti wa ha kini ki 5 snem daw yoh ki khynnah wow tip chaphang kiwa boon ki jait kaam wei lada chem ki yeiwa ka-it ki ye ki wow lai pynliah chooh chooh ha ki por wa yang Result ki wei lada jia wa dam ki wow lai skur leh da em ki i sap wa ye u yarap ya ki wow yoh kreh.
Ha iwi won i liang, u Montri ka chnat puræ puthi, u Rakkam A Sangma da ong u wa kiwa boon ki skur wa ki College hapoh ka jylla dang chem chitom ki wow pynkrehkaam ya ka National Education Policy (NEP) 2020 neibynta uni u snem puræ puthi 2023-2024.
Da pyntip u leh wa hadien wa da dep pynman ya ka yachem wa ki skurbah kam ka NEHU wa kiwi Principal da chim ya ka rai wow yang chwa yei pynkrehkaam ya ka NEP.
Iwi na iwa eh toh wa ka NEP da dawa ko wa toh u em boon ki laiñ puræ ha ki College kiwa boon ym pu ye ki wow leh yeini kamjooh u pynbiang ya kiwa sikai wa iwa emkaam u em ha ki thaw puræ katkam wa da booh hapoh ka NEP.
