U symbood montri rangbah ka jylla u Prestone Tynsong da pyntip u wa ka sorkar da pdiang ko yei tyrwa ka chnat i chait i khiah katkam ka yukheiñ wa da lum ko wow pynman yaka Test COVID-19 ya ki bru paidbah kawa tip kam ka Random Public Testing deiwa pynemkaam da ki Antigen Test Kit.
Ya ini i leh yaki Test da yabhah yaka jylla ha ki 71 tylli ki Cluster (kiwa ye wow em hei maa) heiwa hapoh kawi ka Cluster da em 30-40 tylli ki chnong kiwa yajan wei yaka yukheiñ wa bniah daw tip hadien wa sdang ya ini ha ki jar jiar ki District, da pyntip u Prestone deiwa pynrap wa da leh ya ini yow lait i poor uni u khñiang para wa chong chnong wei hadooh kattæ ym pu ye wow ong wa em i poor para chong chnong.
Hawa kylli yei booddien ya kiwa yachem wa kiwa yoh COVID-19 ha Amlarem, neiliang u DHS (MI) u Dr. A. War da ong u wa da yaleh katwa ye wei ka booddien dang lai ko chakhmat wei ym pu dep neidaw wa kini ki 3 ngut wa yoh toh kiwa yachem wa kiwa boon ki bru neidaw wa kawi toh kawa dai doh, kawi ka wakreh ha dukan cha wa uwi toh uwa ah sniooh wei na kiwa da dep Test kattæ ym pu em wa yoh COVID-19.
Neiliang u Prestone da pyntip u leh wa kattæ da em 40,000 tylli ki Antigen Test Kit wei daw poi sa 1.50 lak tylli wei daw sdang wow leh ya kini Test ha kini ki sngi wow wan.
U DHS da pyntip u leh wa ya kiwa yachem wa kiwa yoh COVID-19 hap hi ki wow chong leh Quarantine hanla man ki leh kiwa yachem pateiñ kamjooh kiwa dep Test daka Antigen wei du hadien wa pyntikna da ka RT-PCR Test wa ym em yoh ki ya u COVID-19 u ye ki wow dam u leh yaka Quarantine.
U Prestone da pynsñiaw u leh yei sñiawngooh ya ki wakreh haka chnat i chait i khiah, ki Doctor ki Nurse, ki ASHA ki Anganwadi kiwa da kreh miet wa sngi khlem da pyrkhat yei yong ki samen deiwa kyntu leh yaki paidbah wow kynmoo ya ki ha ki duwai Blai.
