U Montri Khynnah ka sorkar pyrdi wa pait ya ka Skill Development and Entrepreneurship wa Electronics & IT, u Rajeev Chandrasekhar da wan u cha Meghalaya neibynta ar sngi kawa da kut ynne, heiwa da pynbna u wa ka Digital India Startup Hub lyngba ki Software Technology Park ka India daw sdang ki ya ka nyngkong dooh hapoh ka ri ka wow man kam ka Centre of Excellence in Online Gaming ha Shillong kat ha u Wisu (Mar) 2023.
Da ong u wa kani ka Centre of Excellence ha Shillong daw pynchlur ko ya kiwa seiñ khih (Startups & Entrepreneurs) na waroh kawi ka thaaiñ North East Region yow sdang ki ya ka Next Gen Online Gaming Ecosystem namo wow pynthymme yei rukom krehkaam ka Online Gaming.
“Ini toh i angnood u PM Narendra Modi wa ka juk thymme ki Startup wa Entrepreneur toh u mih ki na Shillong, Kohima wa kiwi ki bynta ka North East India”, da ong u Rajeev Chandrasekhar hawa yaklam wa kiwa thoh khubor ha Shillong.
Ka Ministry of Electronics and IT (MeitY) ini wa dep da pynlait paidbah ko ya ka Draft Amendment yow pynkylla ya ki IT Rules 2021 heiyatoh wa ka Online Gaming yow ye ki paidbah wow e yei buit yong ki.
U Montri da ban joor u yei emkaam ya ki Digital Skills hadien u Covid, neibhah katni awjan waroh i jait da lai ki kam ki mar Digital ha kylleiñ ka pyrthai. Kamtæ ki khynroo khyllood emkaam ki wow yoh ya ka Digital Skills yow ye ki wow chim kabu yeini ha kani ka yaaw Digital Economy.
U Montri da pynbna u leh wa ka MeitY daw sdang ko ya ka National Institute of Electronics and IT (NIELIT) yow e sikai ya ki Digital Skills ha Shillong. Yow chan ya kani daw pynkhreh yei thaw wa heh 10 Acre.
Da pynbna u leh wa ka sorkar pyrdi daw sdang biang ko ya ka Skill India lyngba ka PMKVY 4.0 kawa daw e sikai ya 50,000 ngut ki khynroo ha Meghalaya yow yoh ki yei sikai yow yoh kreh ha ki karkhana wa boon jait. Da pyntip u wa ha Tripura daw e sikai ya 60,000 ngut ki khynroo katwa ha Nagaland won 35,000 ngut.
