15 49.0138 8.38624 1 0 4000 1 https://wyrta.com 300 0

Daw sdang yaka Meghalaya State League-2 ha uni u bnai

0 Comments

Shillong: Ka Meghalaya State League (MSL) kawa ar daw sdang ko haka 25 tarik uni u bnai (November), ha ki soo tylli ki thaw da ki yalehke hapoh ka jylla hapyrdi ki Club waphær ka Meghalaya.

Haka MSL Season 2 daw chimbynta hadooh 20 tylli ki Club kiwa da tipmit ka MFA. Daw sdang yaka yalehke wa nyngkong ha Mawkyrwat wei ki yakhun Final daw pynman cha u Kmaichonglad (December), katwa kiwi de ki thaw wa daw pynman yaka MSL toh ha Khliehriat, Resubelpara wa ha Jowai. 

Kam wow pynkynmoo wa ka 7 Wasa da man ko ka Champion wa nyngkong ka MSL kawa pynman ha u 2017-18 deiwa pynrem ko yaka Tynrongmawsaw.

Ki Clubs kiwa ye wow chimbynta toh kiwa jop ya ki League wa pynman da ki Association wa tipmit da ka MSL ha ki jar jiar ki chnong ki thaw yong ki. Ya ki Team daw yabhah ya ki ha ki 4 tylli ki Group wei daw yachem ki kawi ya kawi mar chisien heiwa kiwa khlieh ya ki Group, daw psiah ki cha ka Two-Leg Semi Final Stage.

Hawa yaklam wa kiwa pathai khubor ynne ka sngi, u Treasurer ka MFA deilang wa u MSL Tournament Director Wanshan Kharkrang da pyntip ki wa kiwa boon ki League toh kiwa da jan poi cha wakut. 

“Chwa wow sdang ka aiom wa thymme daw khut biang sa kawi ka Press Conference yow pynbna lut ya waroh ki Club kiwa daw chimbynta. Ki Club kiwa yoh u chimbynta daw yoh ki leh yaka yarap poisa kamwa da yoh ki haka sien wa nyngkong,” da ong u Kharkrang. 

Katwa u CEO ka MFA u Arki Nongrum da ong u wa hadien wa pynman yaka MSL wa nyngkong, ha kani kynti da em boon ki Association kiwa pynsñiaw yei yei kwah ki wow chimbynta.

Ka MFA da pyntip ko leh wa daw sdang yaka U-15 MSL.

0 Comments

Leave a Reply