U khliehdooh ka National People’s Party (NPP), u Conrad K Sangma da beiñ u ya ka u heh ka Trinamool Congress (TMC), u Dr. Mukul Sangma u wym kheiñkor ya ki bru ka ri-loom Garo deiwa e nongmuna yei yaleh Election u Mukul chibet na kawi, chibet won na kawi ka Constituency heiwa ha ka Election wa dep da yaleh u na ar tylli ki Constituency wei ha kani ka kynti leh da yaleh biang u sa na ar tylli biang itæ na Songsak wa Tikrikilla.
Da ong u wa ki bru da kylli ki ileh chibet na Amparti cha Songsak wei kattu won na Tikrikilla wei lada jop u na waroh ar da kawon u ieh u ka Constituency wei ini pynoo wa ym em kheiñkor ya ki bru.
Hawa klam ha ka yalap Election neibynta u kyrtong ka NPP na Tikrikilla ynnin ka sngi, u Conrad da kylli u na ki paidbah kammon u sñiaw ki wa lada pynjop ki yow Mukul tangwa ym bien u wow jied ya ki deiwa jied da kawi won ka Constituency, kamtæ da ong u wa daw sihlet u Mukul yeini i lehke wei wym kheiñkor ya ki paidbah.
Da beiñ u leh ya u Mukul deiwa ong wa stat u du wow ood wei wow kob deiwa e nongmuna ya katæ ka chna sarok deiwa pynemkaam da ka German Technology ki wym neh tang ar snem leh. “Ka Ganol Project, u Mukul da pynlut u T. 500 klur khlem ye u pyndep katwa u Conrad da pyndep u ka deiwa pynlut du T. 300 klur,” da ong u.
Da pynbaad u leh wa u Mukul da chna poisa u heipor wa man u kam u Montri ka chnat Bordiñ ha u 2009 deiwa pynmih Tender yow chna boon ki Dam wa ki Hydel Project. Da em ki Company wa su da ki klur yow yoh ya kini ki kreh tangwa cheiwon kitæ ki kreh?
