Hadien wa boon napyrdi ki khynroo khyllood kiwa pyndep ya ka SSLC wa HSSLC ha uni u snem da ood da naam ki neidaw wym yoh ki yei thaw lai puræ ha ki thaw puræ ka sorkar waphær waphær, kamtæ ynne ka sngi da em ka yalang wa da pynbait hapyrdi u MLA ka Jowai u Wailadmiki Shylla, deilang u DC ka West Jaiñtia Hills District u Garod LSN Dykes, ka SDSEO yong ka District, ki Principal yong ki skur wa College sorkar deiwa emlang ki dkhot ka JSU neibynta u yaklam hajrong kammon u thooh ki laad ki luti khnang yow yoh thaw puræ ki khynroo khyllood.
Hadien ka yalang wada pynman ha kamra krehkaam u DC, da yohlaad u yaklam wa u Wailadmiki Shylla, heiwa da khana u wa neibynta ka B.A. toh ki wym pu em dap kam ha ki Honours Subject ka Philosophy, Economic wa History neibhah boon ki khynnah puræ wym em jied ki ya kini ki Subject.
U Wailadmiki Shylla da pyntip u wa kamwa man kattæ da rai wow pynsñiawthooh chwa ya ki khynnah boi te bien ki u chim ya kini ki Subject. Hadien ini won daw pait yei man i long chwa wow thoh cha ka sorkar neibynta u pynmih chooh chooh ki kamra e sikai wei wow thung ya kiwa sikai kam ki wakreh Contract khnang yow ye u yarap ya kitu wym pu yoh thaw puræ.
“Hao sñiawthooh hi wa ki khynnah kamwa da ye ki wow pyndep yei puræ, yooluti ki leh u yoh u pteiñ ki yei puræ, tangwa sñiawthooh wa i man i long ha kini ki por phær bha i, khamtam ha uni u snem da yoo wa hapoh ka District yong i boon bha kiwa dooh thaw puræ, ini ye u man neidaw yong kani ka khlam wa boon na ki manbei manpa sñiaw tieñsar ki wow phah skur ya ki khon cha baar,” da ong u Wailadkimi Shylla.
“Kam ki bor District, kam u MLA deilang wa ki dkhot ka JSU sñiawkhia i yeini i bynta ki khynnah kamtæ da pynbait ya kani ka yalang, wei yooluti wa ka sorkar u ap ko neibynta u pynyoh thaw puræ ki khynnah,” da ong chooh chooh u Wailadmiki.
