U Montri wa pait ya ka chnat Bordiñ ha ka jylla, u Abu Taher Mondal da ong u wa ka chnat daw pyntikna ko kammon wow pynbha yei rukom krehkaam, nadooh ka Meghalaya Power Generation Corporation limited, ka Meghalaya Power Transmission Corporation Limited wa ka Meghalaya Power Distribution Corporation Limited.
Da ong u leh wa neibynta wow pynbha yei rukom krehkaam ka chnat daw hap ko wow pait yeiyi wa da dooh nong, khamtam kiwa boon ki thaw krehkaam kiwa dang sahkut i su cha ka chnat bordiñ.
U Mondal da khut u ya ka yalang wow bichaar yei long i man yong ka chnat Bordiñ ynne ka sngi heiwa da ya phyllu yumut wa ki heh ka chnat neibynta wow wanrah yei krehkaam wa bha wei kawa yoh myntoi.
Hawa yatoh wa ki kreh kiwa dang sahteiñ wei kiwa da pynkreh katni, u Montri da ong u wa ya ini i kaam ka chnat da yaklam sani bha, wei da pynsñiaw wa ya ini da emkaam wow bichaar bniah bha, neibhah em boon ki kreh “Power Project” ha ka jylla kiwa da sdang nadooh u snem 2007 wa 2010 tangwa ki wym pu ye wow pynkrehkaam hadooh katni.
Da ong u wa ini i kaam daw chimkhia bha wei daw thoh leh cha kitu ki Company pynmih bordiñ (Private Power Producers) yow tip yei thmu ki, wei lada ym em mon de ki wow kreh, ka chnat daw pyndam bait noh ko ya ki kreh ki wei daw wanrah won da kiwa thymme.
Hawa yatoh wa i pynkrehkaam ya ka Saubhagya Scheme wa i pyndait ya u Smart Meter, u Mondal da ong u wa daw pait bniah bha ya ini i kaam leh, tangwa neidaw wa dang em ini hapoh ka takit, daw yang chwa ya ka bui (Report).
U Mondal da ong u leh wa daw chimkhia u hawa yatoh wa i su tulop tikna ya kiwa kreh ka MeECL, heiwa da pynsñiaw u leh wa ka chnat toh u man ko leh kawa yoh nong nei dai wei thied bordiñ yow ye u su tulop, tangwa kamwa man katni, ka chnat dang em ko hapyrdi i dooh nong wei daw hap wow thooh ki laad wow pynduna yei dooh nong wei wow pynbha wei wow pynbiang ya ki wakreh.
