U Montri wa pait ya ka chnat PWD (Building), u Dasakhiatbha Lamare da ong u wa daw thung ya ka takit hajrong i pynbaad wa kreh khalær ya ka Inter State Bus Terminus (ISBT), wei hadien wa da yoh ya ka bui (Report), ka chnat daw bichaar ko kammon wow leh.
Hajrong i sylli ka Central Scheme Monitoring Committee (CSMC) yong ka BJP, kawa da rai wow ujor wei wow pyntip yeini i kreh khalær cha ka sorkar pyrdi wa ka NEC, u Montri da ong u wa ka chnat daw jubab ko lada emkaam cha ka DoNER næ ka NEC hajrong ini i kreh.
Hawa kylli, u Montri da pynksan u wa i kaad wei joo um ha iwon iwon i kreh jooh em i wei ymye wow lait khamtam nei man i long ka rymaw, wei da ong u wa u Contractor daw hap chna pynmiat biang u ya ini i thaw.
Hajrong i chem ya ki phong wa ki jri wa da sap yow chna ya kani ka yung, u Dasakhiat da ong u wa ya ki kreh wa heh emkaam wow pynyalait nei ya tyngkhooh, khamtam wa ka ISBT kawa psiah wa mih ki kari kiwa heh kiwa ye wow pynkhih ya i yung waroh iwi wei khamtam lada em i khih (kyrbeh) yow lait won nei yatyngkhooh næ piah.
