December 14, 2017

Daw ujor O cha ka High Court wow pynman dorbar biang: SS Langi

Advertisement ad1

Jowai: U SS Langi ha ka khubor wa da pyllait u, da ong u wa i pyllai ya ka Dorbar ka chnong Ummulong da u Chairman katkam wa da ebor ya oo da ka District Council wa u Dolloi katkam ka hukum ka High Court toh kawa khlem bood ya ka kyndon aiñ (Rule).

Da ong u wa ha kawon kawon ka Dorbar toh u emlang 50% kiwa chong chnong tangwa heini nawon ym em u lai ko katkam ka kyndon aiñ neibhah chwa wow pyllai ya ka dorbar toh u em kiwa da biang i rta (Adult) wei kini duna ki katkam wa da booh da ka aiñ.

Da ong u wa i e laad ya kiwa na baar ka chnong wow em bynta ha kani ka yalang man i iwa ym ye u pdiang wei yeini da boh ki paidbah wei yeini hi ym em wa ap, ym ye u pdiang leh ya ki khynnah ha ka dorbar.

Chooh chooh da on u wa hapoh ka dorbar da em kiwa thoh khlem akor ha ki banner pyrchah ya oo iwa da dai sarom ya oo wei neiliang yong oo da boh u yeini ha u Dolloi wow phah kyrriah ya kini ki banner tangwa ym em wa mano.

Heijhooh i por da ong u wa i awri awra ha kani ka dorbar wei i wym elaad kiwa pyllai ya ka dorbar ya nga wow klam kam uwa chah ujor (No Confidence) daw ujor u cha ka District Council kamjooh cha ka High Court wow booh tarik da iwi won wow pynman dorbar.

Da pynkut u deiwa ong wa lada kiwa pyllai ya ka Dorbar wa u Dolloi e ki ya ka bui (Report) ka wym yahaap katkam ka aiñ daw ngat ki ha ka Contempt of Court neibhah wa katkam wa hukum ka High Court toh u bood thij katkam ki aiñ dorbar wa yatoh wa ki Waheh Chnong khamtam ha kam kini ki special dorbar.