U Prime Minister ka ri, u Narendra Modi daw wan yalap Election u ha Imphal, Manipur ha ka 22 tarik uni u bnai neibynta ka Election MLA kawa 12 ka Manipur kawa daw pynman ha ka 28 tarik uni u bnai.
U Modi daw wan yalap Election u ha Luwangshangbam Sports Complex neibynta ki kyrtong ka BJP.
Neiliang ka BJP Manipur Pradesh President ka A Sharda Devi da kyntu ko ya ki paidbah wow mih ki yow pynyoo yei krehlang wei yei kyrchaan ya u Prime Minister wei da yooluti ko wa daw em palat 1 lak ngut kiwa da wan cha kani ka yalang tangwa neidaw wa em ki kyndon yada COVID-19 daw chah u wan 1 lak ngut ki bru wa man 50% na iwa chniam katkam ki kyndon wa da booh da ka Election Commission of India.
Heiyatoh wa ini, neiliang ka Coordination Committee (CorCom) kawa man ka synjuk ki seiñ kieñ suloi ka Manipur, da khut ki wow pynman da ka khang chnong wei wow ‘Boycott’ ya ini i wan u Modi chapoh ka jylla.
