Uwa yahkhmat ka liang pyrchah, u Dr. Mukul Sangma da ong u wa ka Congress da pynkhreh ko wow wanrah ya chiboon ki phang yaklam ha kani ka dorbar (Autumn Session) ka sorkar kawa daw sdang ha ka 10 tarik u Naikhynde heitæ i rukom wym pynsepai ya i por neibhah da boon ware ki kaam wa hap wow yatai.
Iwa hakhmat dooh da ong u toh hajrong ki kaam wa yatoh wa ka aiñ wa i chongsuk chongsaaiñ wa i sdang khai khlieh biang kiwa boon ki kaam ki seiñ kieñ suloi hapoh ka jylla kamjooh yei chngaaiñ ki bru wa sah ha khappood wa kiwi ki jylla.
Da ong u i wym ye ka sorkar wow wanrah yei sñiaw chngaaiñ ha ki paidbah wei wow leh yeiwa emkaam hawa chah thombor ha ki bru kiwa na kiwi ki jylla iwa da yoo wa kiwa da mih pyrthai wei ini toh iwa da pynkhuslai bha wei man ko ka phang kawa emkaam bha.
Da kdaw u leh yei wym khyrngiat de ka sorkar hawa yaleh pyrchah ya COVID-19 iwa da man iwa da chon bha hei sñiaw ka liang pyrchah.
Chooh chooh da ong u wa kiwa em hapoh ka sorkar MDA toh u wanrah ki da ka No Confidence Motion pyrchah ya ka sorkar wa yahkhmat da u Conrad Sangma.
“Ki bru ka jylla da ong ki ya i wa ha ini i por kiwa em ha ka liang synchaar toh u wanrah ki da ka No Confidence Motion pyrchah ya ka sorkar wei ini toh iwa da wan pyntip cha i,” da ong u Dr. Mukul Sangma deiwa pynrap wa ka Congress daw kyrchaan ko ya ini.
