Daw yachem ki montri rangbah ka Meghalaya waka Assam hadien ka 23 tarik

Shillong: Ka sorkar Meghalaya waka sorkar Assam daw chong yaklam ki heiyatoh wa u pood hadien ka 23 tarik uni u bnai.

Da pyntip ya ini ynne ka sngi da u symbood montri rangbah u Prestone Tynsong hawa yaklam wa kiwa thoh khubor hadien wa wai ka yalang ki montri. Da beiñ u yaka Congress wa ym ye ki u pynbait ya kani ka kaam heipor wa em ki heibor da boon snem ha waroh artylli ki jylla.

“Hadien ka 23 tarik ki montri rangbah ki ar jylla daw yachem ki yow yaklam ya kani ka kaam, wei i leh ym em de kwah i wow mih chooh kiwon kiwon ki awri awra ha ki thaaiñ khappood waka Assam,” da ong u Tynsong.

Heiyatoh wa iwa jia ha Balakhawa, Ri-Bhoi District iwa em khappood ka Meghalaya-Assam heiwa i yung yong u Secretary ka Hima Nongspung u Michael Warjri da chah tympra i wei da chah kem u ha ki pulit ka Assam, u Tynsong da ong u iwa jia toh iwa sñiawsih wei ki pulit ka Assam toh u pyntip ki ya ki pulit ka Meghalaya chwa wow kem ki ya kiwon kiwon ki bru napoh u pood u ang ka Meghalaya.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

“U montri rangbah yong i wa u montri wa pait ya ki kaam pohyung da dep yaklam ki wa u montri rangbah ka Assam heiyatoh wa ini i jia,” da ong u.

Da phah leh ya ka DC ka Ri-Bhoi District wa u Superintendent of Police wow e ki ya ka bui (Report) cha u montri rangbah wa cha u montri ka kaam pohyung.

U Warjri da pyrchah u ya i chna ya u sarok PMGSY da ka sorkar Assam wei da pynlait ya oo na patok ynnin ka sngi da ki pulit ka Assam hadien wa yoh jamin u.

Heiyatoh wa i chna ya u sarok PMGSY daka Assam haka tai ka chnong, u Tynsong uwa pait leh yaka PWD (Road) da ong u wa ka sorkar Meghalaya dang paan bor ko naka Hima Nongspung wow chna sarok ha ka tai ka chnong iwa pynyoo che wa thaw haap ko hapoh Meghalaya.

Katkam ki kot ki sla da pyntip u Tynsong wa ka Hima Nongspung da dep e ko ya ka ‘No objection Certificate’ yow chna ya u sarok PMGSY.

“Ka PMGSY toh ka Scheme naka sorkar pyrdi wei ym toh ka Scheme ka sorkar Assam. Kamtæ lada chna daka Assam næ da ka Meghalaya, toh u e laad wow chna pyndep yow yoh myntoi kiwa chong wa sah cha khappood,” da ong u.

Hawa kylli wa lada ka sorkar Meghalaya ieh mylliñ ko yaka tai ka thaw, u Tynsong da ong u wa da em ki kaam pynroi kiwa da mynjur wow sdang ha ka tai ka thaw.

U Tynsong da pyntip u leh wa da em ka sñiawthooh yumut da ki ar tylli ki jylla wa ym toh u pynwit ya ki kaam pynroi ha ki thaw wa em ka kajia wei emkaam wow pyntip chwa wow sdang ya kiwon kiwon ki kaam.