Shillong: U Montri wa pait ya ki kaam pohyung hapoh ka jylla, u Lahkmen Rymbui da beiñ joor u yei chah dawa poisa wei i pyntieñ yong ki Hmar People Convention Democratic (HPCD) ya ki Khasi kiwa chong wa sah ha ka chnong Atukhal kawa haap ha Cachar District yong ka jylla Assam kawa em markhap wa ka jylla Manipur.
Hawa klam ynne ka sngi, u Rymbui da ong u wa kam u Montri kaam poyung ka jylla, daw yaklam u wa u Montri Rangbah, u Conrad K Sangma wow pynhikna yei chngaaiñ ki bru yong i kiwa em ha kiwi ki thaw.
Da ong u wa hanla ki toh ki jaitbru Ynñiawtrep, tangwa ka sorkar kamwa man kattæ ym ye ko wow tuklar neibhah wa hap wow lai katkam ki kyndon, neibhah ki bru kiwa chong ha katai ka thaw toh kiwa chong chnong ka jylla Assam wei ka sorkar Assam toh u chimkhia ko hajrong ini wa jia.
Da ong u wa ka sorkar Meghalaya dang hap ko wow thooh yutip ya iwa jia, wei kiwa chong chnong ym toh wow chem chitom ki nei chah pynthut ha kiwi won ki jaitbru.
Kam wow pynkynmoo wa ki Khasi kiwa chong wa sah ha chnong Atukhal da pynman ki yei thaw rieh ha yungmane nadooh ka 26 tarik uni u bnai, wei ini i hap ki wow yut rieh toh wa hadien wa da kut i e por da ka HPCD wow su T.8 lak kam ka bai lutksan ha ka 25 tarik uni u bnai. Ini i dawa yong katai ka seiñ kieñ suloi toh hadien wa le ngut ki dkhot yong ka da chah kem ki ha katai ka chnong.
