Jowai: U General Secretary ka HNLC uwa man leh u Publicity Secretary ka seiñ, u Saiñkupar Nongtraw ha ka khubor wa phah u da ong u wa i chah khang wow tih mooyong da ktah ko ya kiwa dooh wa duk wei ym ktah ko ya kiwa mahajon.
Da ong ko wa ki spah ngut ki khynnah skur da haap sangeh ki wow lai puræ wei da ki hajar ym em poisa ki wow psa khon.
Da ong u wa lada ka NGT em ko i bor wow pyndooh yei khih i khan toh u embor ko leh wow e khih ya kiwa chah ktah da kiwi tawon. Ini da ktah i leh ya ka sorkar jylla ha kini ki snem wa da chah khang u mooyong kawa da dooh ya ka dan wei katwa dang lai ki snem dang hiar i kamai ka sorkar.
Da ong u leh wa i rukom tih mooyong hapoh ka jylla wa tip leh kam ka Rat Hole Mining da wanrah ko yei dooh i duk wa i yapiah para jaitbru wei daw pynbor ko leh ya ki paidbah wow chim ya ka aiñ ha ka kti yong ki deiwa e nongmuna ya iwa jia ya ka Agnes Kharshiing kawa da chah thombor deiwa pynbaad wa ki pulit toh kiwa pynchlur ya ki paidbah wow pynmynsoo ya ka heipor wa lai ko cha ki thaw tih mooyong wa man pyrchah ya ka aiñ.
Da pynrap u deiwa ong wa hapoh ka jylla nadooh kiwa khayi mooyong, ki pulit, kiwa mihkhmat paidbah hadooh ki sahep sorkar emkti ki ha kani ka kaam pyrchah aiñ wei lada man ko katkam ka aiñ hadooh katwon u yoh nong ka sorkar kamjooh ki paidbah kamtæ ka sorkar da toh i por wow pyrkhat ko wa kammon u pyndooh noh yei chah khang tih mooyong.
Ka seiñ da ong ko leh wa da sñiawkhia ko yei dawa ki 13 tylli ki seiñbhalang kiwa dawa wow pynyieñ noh ya ki Entry Exit Point ki wow pait yei psiah i mih ki baar jylla chapoh ka jylla heiwa i dawa man ko kawa sah da boon snem wei da em i kyrmen wa ka sorkar kawa katni hapoh i yahkhmat u Conrad Sangma u ye ko u leh ya ini tangwa ym em poi thong wei da toh por u khyrngiat thiah noh ka sorkar jylla chwa wow yoh pyrtuid thymme ka jylla kam ka ‘Bangalaya’.
(Feature Image-File Photo)
Discussion about this post