Ynne ka sngi, u montri rangbah ka jylla, u Conrad Sangma da ong u wa ka sorkar jylla da yoh yarap poisa (Externally Aided Project) ko hadooh T. 700 klur na ka New Development Bank (NDB) neibynta wow pynmiat ya ki thaw uiñke suwari hapoh ka jylla wei yeini da ong u ha ka yalang heipor wa lai paitke u ya ka thaaiñ San Chnong ka East Jaiñtia Hills.
Ka NDB man ko kam ka World Bank ya kawa da sdang da ki ri wa em hapoh ka satri BRICS (Brazil, Russia, India, China wa South Africa) wei ki kreh hapoh ini i yoh yarap wa T. 700 klur u kynthup i ym du wow pynmiat ya ki thaw uiñke suwari hapoh ka jylla tangwa daw kynthup leh wow chna ya ki sarok wa kiwi kiwi wei ka sorkar emkaam ko wow pynkhreh ya ki Project Report chwa wow yoh yarap na ka NDB.
U Conrad Sangma ong u wa sñiawkmen u wow yoo da ki khmat yong oo hi wa miat kini ki thaw ha kani ka thaaiñ wei emkaam wow thooh laad kammon u yoh kreh neini lyngba ki kaam uiñke suwari.
Chooh chooh da ong u wa ki mar pohkhyndaw daw lut ki ha kawi ka sngi katwa kamtæ emkaam wow pyrkhat ya ki 20 snem wa daw wan khnang wow ye u leh yeiwa emkaam wow im wei wow yoh kreh ka mynried ka pateiñ hadien.
Da ong u leh wa ka sorkar i kaamram yong ka toh du wow chna ya ki kyndon krehkaam namo ki Policy wei wow pynmiat ya ki thaw tangwa i kaamram ki bru won wow pynneh pynsah ya ki khnang wow ye wow im na ki kreh uiñke suwari.
Ynne ka sngi heipor wa lai paitke u Conrad ya ki thaw wa em hapoh ka thaaiñ San Chnong da synraan ya oo da ki ar ngut ki montri ka sorkar jylla kiwa kynthup ya u Lahkmen Rymbui wa u Kyrmen Shylla uwa man leh u MLA ka thaaiñ.
Ha kani ka sngi da em ka yalang ha Sahksaw ya kawa da pynlai da ka San Chnong Welfare Association, Mukhaialong heiwa da yoh yei klam na u Kyrmen Shylla uwa da ong wa kani ka juk toh kawa chem chitom wow yoh kreh tangwa dei pynemkaam yei miat ki thaw ha kani ka thaaiñ ye ki khynroo khyllood wow yoh kreh na ki kaam uiñke suwari.
Da kyntu u leh ya u Conrad Sangma wow chimkhia wow thooh ki laad ki luti wow ye u chna ya u sarok na Lumchyrmit cha Shkentalang kawa em ha West Jaiñtia Hills ka wow yarap u pynku ya ki kaam uiñke hapoh ka thaaiñ.
Ynne neiliang ka San Chnong Welfare Association da e ko leh ya ka dorkhat ha u Conrad heiyatoh i emkaam kani ka thaaiñ.
