Ynne ka sngi ha ka yalang kynmoo burom ya ka sngi wa kyrpang yong ki bru wa em duna hei doh i pran wa tip kam ka International Day of Person with Disability wa da pynman ha pchem ka Ephphatha Society ha Dkhiah West, East Jaiñtia Hills District kawa man ka seiñ wa pait kyrpang neibynta ki bru wa duna hei doh i pran, neiliang u Deputy Commissioner ka East Jaiñtia Hills, u Shivansh Awasthi da wai haroh u ya u mooyurim neibynta u chna Hostel khnang wa kiwa duna i doh i pran wa wan na ki thaw wa jngai wow pyndep chah sikai waphær waphær u yoh thaw sah ki.
Kani ka yarap da yoh ki lyngba ka District Mineral Fund Scheme (DMF) yong u snem 2024-2025 wei da mang u chna 3 kamra deilang ki paikhana neibynta ki kynthai wa chynrang.
Ha kani ka sngi najrong u Deputy Commissioner da emlang leh u DSP ka East Jaiñtia Hills District, u Spearsing Pasleiñ kam u symbood kongsan, ka Basuk Kharbihthai, Secretary DLSA East Jaiñtia Hills wa kiwi ha ka yalang wa pynlai da ka Melody War, Legal Adviser Ephphatha Society.
Kamwa ka phang yong kani ka sngi ong ko “Applying the leadership of persons with disabilities for an inclusive and sustainable future” ka Basuk Kharbihthai, Secretary DLSA East Jaiñtia Hills da pynkynmoo ko ya kiwa duna hei doh i pran wym toh u dooh mynsien ki neibhah wa ki leh em ki ka jooh ka hok wow mih chakhmat ha kawon kawon ka kaam ha ka imlang sahlang katkam i bor wa ye ki la wow man kiwa yahkhmat ha kawon kawon ka bynta næ wot wow man kiwa mihkhmat ha ka kam saiñ hima sima.
Neitæ da pynche haroh ko cha kiwa duna i doh i pran wa lyngba ka District Legal Services Authority ye ki leh u yoh yei yarap wa kyrpang kiwa yatoh wa ka aiñ khlem iwon iwon i su.
U DSP Spearsing Pasleiñ hawa yaroh ya ki kaam ka Ephphatha Society, kyrmen u wow nang ye u kreh bha neini chakhmat neibynta ki para bru, deiwa kyntu leh wow lum u lang chooh chooh ya kam kini ki bru neibynta u pynyoh ki laad yarap næ ki Awareness waphær waphær.
Pyntip haroh u cha kiwa duna i doh i pran wa kam ka chnat pulit leh man kiwa smat u yarap ya ki hawa wan mih paan yarap ki.
Neiliang u kongsan hawa klam ong u, ka sorkar bei kamjooh ka sorkar jylla da yaleh ko u thooh ki laad ki luti yow pynbha chooh chooh yei hok i rukom im ki bru wa em duna la heiyatoh ka bhah yoh khih yoh khan, ka bhah puræ puthi wa kamjooh leh i pynchitom ya ki bru wa ban beiñ ya kiwa duna i doh i pran.
Wei kawa kongsan tam ong u, toh u wanrah i kylla hei thij i pyrkhat ki paidbah wa ka sorkar neibynta ki bru wa em duna itæ toh ym wow pait ya ki kam kitæ ki bru wa em duna tangwa kam ki bru wa em iwa rap phær, neibhah han lym biang i doh i pran kamwa manlang kiwa boon walang leh tangwa ye won ki wow leh iyi ræ iyi wa kyrpang.
Kamtæ emkaam wow sñiawthooh wow pdiang wa uwon næ kawon em ki ka bynta wa kyrpang, wei wow e mynsien hajrong kayi ka sap næ i man kyrpang wa em ki.
Kamwa kani toh i sdang yong ki bor District East Jaiñtia u yakrehlang wa ka Ephphatha Society, yooluti u wa neini chakhmat daw ye chooh chooh u pynku ya kani ka Society neibynta i myntoi ki bru wa duna hei doh i pran.
Ha kani ka sngi ka Ephphatha Society da e yarap haroh ko da ki Wheelchair cha kiwa duna i doh i pran kiwa chem chitom u yieñ u kaap.
Discussion about this post