I dawa wow pynman ya ka takit hajrong i yap ki arngut ki jaitbru Garo ha Gurugram, Haryana kiwa na Dimapur, Nagaland da sdang joor i heiwa ka MP ka Tura wa uwa yahkhmat ka liang pyrchah hapoh ka jylla u Dr. Mukul Sangma da thoh ki cha u Amit Shah wow pynman ya ka tikit yow chem tre yei daw wa yap ki arngut kitæ ka Rose Sangma ha ka 24-06-21 hapoh ka ALFAA Hospital, Basai, Gurugram, Haryana wa i rukom yap u pyrsa ko u Samuel Sangma ha ka 25-06-21 heiwa da em i suba wa da em iyi re iyi i daw wa yap kini ki arngut.
Neiliang u Montri Rangbah ka jylla u Conrad Sangma leh da dep yaklam u wa kiwa hayung hasem kini ki arngut deiwa kular wow yarap yow chem yeiwa jia sakhiat yow yoh kiwa da khlaad yei hok.
Neiliang ka GSU wa ka NESO leh da dawa ki wow pynchitom ya kiwa emkti ha ini i kaam.
Kam wow pynkynmoo wa ya u Samuel Sangma da chem wa da pasi u hapoh ka kamra wa sah u chi sngi hadien wa ka Rose Sangma da khlaad ko hapoh ka thaw sumaar ha Gurugram.
Ini waroh da sdang i hadien wa da li booh ya ka Rose cha ka ALFAA Hospital, Basai, Gurugram wa em ha Haryana hadien wa ka Rose da ood ko wa joor kjut ka kti wa ka kjat ko hei step ka 23-06-21 heiwa da booh ya ka hapoh ka ICU.
Hadien wa da sumaar ya ka wei da chem toh wa da sdang ko wow chait, ki arngut wa yang ya ka wa kynthup ya u ma u Samuel da mih u yow lai baam katwa ya u Samuel da phah wow lai thied dawai u.
Hadien wa wan biang ki, da chem ki wa ki wakreh ka Hospital da e ki ya ka Rose wow baam ko da i Ice Cream heiwa kini ki arngut da noh ki ya ini i Ice Cream wei da dawa ki wow tip iyi i daw wa da e ki da i Ice Cream.
Hadien ini, ka Rose da khlaad noh ko heiwa ym em leh ya ka Post Mortem yow tip yei daw wa yap ko, wei da booh smat da ka Mortuary Van yow kit yei metyap khlem da pyntip cha kiwa hayung hasem.
I Video wa riñ u Samuel iwa da pynpoor ha Internet toh iwa riñ hapoh kani ka Hospital heiwa da kylli u ya ki wakreh kani ka Hospital iyi i daw wa e Ice Cream ki ya ka Rose wei ha ini i Video leh da em i bynta wa tba-kti u Doctor kani ka Hospital ya u Samuel.
Neiliang kiwa hayung hasem da ong ki wa heipor wa chem yei metyap u Samuel da em i kha jngem ha thnga wa i doh u wei ym nagait ki wow chim u pyn yei mynsien yong oo hi.
