Ka BJP 19 South Shillong Unit, ha ka yalang jhan wa da pynman ha ka yung krehkaam ka Party wa em ha Kench’s Trace, da bieñ ko ya u MLA ka Party, u A.L Hek yei rukom jied u wow em na ka liang wow beiñ du neibynta i myntoi samen yong oo.
Ka Party da ong ko wa ini wa da jia ha ka yalang kawa dei khang dwar da bna paidbah yeiwa jia pyn deiwa klam u dkhot ka Party wei ini ym toh iwa ye u pdiang.
Ka BJP da ong ko wa ki phang da wanrah da ka UDP lyngba u Metbah Lyngdoh, tangwa u Hek da yahkhmat u kdaw kti ya ka Party, wei ini i leh ar sap toh i wym ye u pdiang wei ka Party toh u pait wei wow leh iyi iyi hajrong ini.
Ka Party da ong ko wa i phang chah thombor ki Christan wa da wanrah da u Metbah Lyngdoh, da wohnia da u Sanbor Shullai uwa da yieñ yow klam wa ka BJP toh ka wym em pait chiliang lane leh chiliang ko ya kawon kawon ka niam tangwa u Hek won da pyrchah u yeini wa ong u Sanbor.
Hajrong ini da ong wa u Hek da leh arsap u deiwa tympiah ya ki lok wa em hapoh ka sorkar MDA kamjooh ki lok wa em hapoh ka NEDA heiwa ka BJP waka UDP da emlang ki. Kamtæ da kylli wa lada u Hek uwa yajan wa u Mukul wa kiwi ki dkhot ka TMC, da sdang thooh thaw u chawi?
Ka BJP da ong ko leh wa nadooh wa dooh u Hek ya ka chuki Montri da sdang wiarnar u. Da kylli leh wa lada yaleh u katwa ye yow ktah yei dur ka BJP, ileh da pynchna dur u ya ka BJP kam kawa man pyrchah ya kiwa khian paaid? Da ong leh wa ini wa klam u da man ko iwa maa iwa da bood leh ya ka BJP kawa yaleh wow yada ya ki khian paaid ym du ha Meghalaya tangwa hapoh ka ri waroh kawi.
Kamtæ da ong wa da toh i por ya ka Party wow pynbait ko yeini wei wow khang yeini i thong samen u Hek uwa khlem da pyrkhat ya ka Party kamjooh ya ka jylla. Wei lada ym ye u wow mynjur wa ka Party toh u man u uwa laitlooid wow lai cha khloo kam i rukom man u. Wei ka Party toh u leh ko yeiwa emkaam yoh pynchitom ya u Hek yow man kam ka nongmuna deiwa beh seiñ ko khlem da beh por hadooh wa ye ka BJP na Delhi wow chim yei rai.
Ka kyrwoh na u P. Sharma, Vice President wa Convener ka BJP 19 South Mondal wa State Executive Member, BJP Meghalaya Pradesh.
