theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1
Advertisement ad1

Dawa ka BJP wow pyndam ya waroh ki kyndon wa da pynngat ya u Bernard Marak

Advertisement ad1

Ka  Bharatiya Janata Party da beiñ ko yei chah kynreh ka Farm House u Bernard Marak wa em ha Edenbari, Tura. Neiliang u State President ka BJP Meghalaya, u Ernest Mawrie da ong u wa da dep u wow yaklam wa u Bernard wa kiwi ki bru wa em burom ha kani ka thaaiñ wei da sñiawthooh u wa u Bernard Marak da chah pynbood naam u wei da leh yeini neidaw ki kaam Politics wei wow pynhiar tput.

Da khana wa kani ka yung toh kawa em soo mala wei ka mala wa na tre dooh da pynemkaam yow baam khawai. Ka mala wa ar toh kawa em em 30 kamra da pynman kam ka thaw sah (Homestay). Ka mala wa le toh kawa da pynemkaam kam ka Hostel ya ki khynnah wa wan na ki yung wa dooh wa duk na kylleiñ ki thaaiñ ka Garo Hills.

Kini ki khynnah toh kiwa da sah heini nadooh i por ka khlam COVID-19 heiwa u Bernard Marak da kyrchaan poisa u leh ya ki. Na kini ki khynnah kiwa da rah da ki pulit, 5 ngut toh ki khynnah kian kiwa da kyrchaan da u Bernard Marak yow lai puræ ha Edenbari School wa ha Auxilium Convent School ka Tura. Chooh chooh da rah leh ki pulit ya u kurim wa pait ya ki wa i khon ki. Kiwa chi kurim kiwa dai baam (Fast Food) ha kani ka thaw leh da rah ya ki da ki pulit.

U Ernest Mawrie da ong u wa ki bru wa da chah kem na kani ka Farm House toh kiwa da su da ka poisa yow sah heini wei ki kari wa rah ki pulit toh ki yong kini kiwa wan sah. Chooh chooh da ong wa ki paidbah ka Tura man-i-por wanke ki cha kani ka thaw yow lai baamdoh wei sah miet ki leh. Kiwa wan leh toh kiwa wan na ki yung ki sem wa em burom wei wow ong wa kani ka thaw toh ka “Brothel’ toh i wym ye u pdiang. Wei kani ka thaw da lai ko chakhmat u krehkaam la 3 snem khlem yoh kawon kawon ka ujor.

Kamtæ da ong wa ini waroh i pynbaad toh yow pynbood naam wei pynsih yei pyrtuid ka BJP wa kamjooh ya u State Vice President wa Convener ka Garo Hills, u Bernard Marak neidaw wa da maya ki bru oo hapoh Garo Hills khamtam ha Tura South.

Chooh chooh u Mawrie da ong u wa ha ka 21 tarik uni u bnai, chi sngi chwa u lai kynreh, ki khynroo ka NPP da lai biah Poster ki ha kylleiñ ka Tura yow pynbood naam wei wow thaad yei pyrtuid u Bernard Marak. Kamtæ da ong wa da che kdar wa kani toh du ka kaam Politics pyrchah ya u Bernard Marak heiwa ka bei yong oo leh da chah lai kynreh i yung ko khlem da leh yeiwa emkaam katkam ka aiñ namo khlem da yoh Warrant wei ini toh du wow pyndik ya ki bru.

U Mawrie da ong u wa katni da tieñ boi ya jia iwon iwon yei mynsien u Bernard, kamtæ u State President ka BJP da kyntu u ya ka sorkar wow e yada ya u Bernard wei wow pyndam noh ya waroh ki kyndon aiñ wa da chah pynngat neibhah ini toh du wow pynsih yei pyrtuid ka Party.

Share this:
Previous

Poi noh ka lympung yalehke Badminton ka LBBA chawa kut

Next

Pynkup burom u DC ya kiwa yarap ya kiwa sahkut wa kiwa pynkhooid khyndaw wa oor