Dawa ka Congress na ka sorkar jylla wow pyndam ya ka ujor pyrchah ya ka Lokayukta

Shillong: Ka Congress kawa em ha ka liang pyrchah ha ka jylla, da rai yakhun ko hadooh wa ka sorkar jylla yow pyndam noh ko ya ka dorkhat kawa da ujor ha Meghalaya High Court pyrchah ya i bor ka Lokayukta.

Ka sorkar jylla da ujor ko da ka dorkhat pyrchah ya ka hukum ka Lokayukta wow ekti ha ka Central Bureau of Investigation (CBI) wow takit hajrong i challan tooh ya u mooyong ha ka jylla. Tangwa neiliang ka sorkar jylla da ujor ko pyrchah ya kani ka hukum ka Lokayukta ha ka Meghalaya High Court wei ini dang sahteiñ i.

Hawa yaklam wa kiwa pathai khubor ynne ka sngi uwa yahkhmat ka liang pyrchah ha yung dorbar chna aiñ, u Dr. Mukul Sangma da ong u wa ka Congress daw yakhun bait ko wow pynbor ya ka sorkar jylla wow pyndam noh ya kani ka dorkhat.

U Dr. Mukul da ong u wa i ujor ka sorkar pyrchah ka Lokayukta, pynyoo i wa e mi thmu wa sih wow murieh yeiwa sakhiat deiwa kylli yi wow khlieh ya kani ka kaam wow pynjngut ya i bor ka Lokayukta.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Da kylli u leh yei leh ka sorkar Meghalaya Democratic Alliance (MDA) deiwa ong wa pynyoo i wa mut ko wow yada yeiyi yeiyi deiwa ujor pyrchah ya i bor ka Lokayukta.

U Dr. Mukul da kylli u leh wa uyi sang u bru wa embor wow phah ya ka sorkar wa emkaam wow ujor cha High Court pyrchah ya i bor ka Lokayukta.

Heijooh i por da ong u wa ka jylla Meghalaya toh kawa da yoh naam wa lait ko nei baam-tooh wei emkaam wow pynneh ya ini i burom wa yoh ko.

Da beiñ u leh ya ka sorkar hapoh ka i yahkhmat ka NPP wa ym em thung ko ya ki bru wow em hapoh ka Lokayukta wow krehkaam ko pura, neibhah kani ka sorkar ym kwah ko wow yoo wa ka Lokayukta u man ko kawa krehkaam.