Ynne ka sngi ka East Jaiñtia National Council (EJNC) hapoh i yahkhmat u President yong ka, u Sambormi Lyngdoh da e dorkhat ki ha u DC ka East Jaiñtia Hills, u A. Baranwal heiyatoh wa ki kyrdan kreh waphær wphær hapoh ka District Selection Committee (DSC) ka District.
Ha ka dorkhat ka seiñ da pynsñiaw ko wa ha ki por wa dadep da duna bha kiwa yoh kreh ha ka DSC ka East Jaiñtia kiwa man kam kiwa chong chnong kani ka thaaiñ. Kamtæ ka seiñ da pynsñiaw ko hakhmat u DC wa katkam ka Reservation Policy ha ki chnat sorkar wei katkam ka Office Memorandum No.PER.272/72/5. Dated 18th Dec.1972 ha ka para 2.2 da klam ko deiwa che wa ya ki kyrdan kiwa ymye u chah kyrriah kreh (Not Transferable) toh u lai bait i cha kiwa chong chnong ka District (Local Residents) iwa pynyoo wa emkaam u e kreh du ya kiwa im pyn hapoh ka District.
Hawa yaklam wa u DC, neiliang u Sambormi da ong u wa ka seiñ chimkhia ko yeini khamtam hawa ya ki khynroo khyllood kiwa na kylleiñ da boon kiwa da thap lang hapoh ka DSC ka District hawa em hok ya ki tre District wow yoh kreh, wei lym pynkhlaad ya ki wym toh hok u yoh pyndap kreh ha ka DSC, daw pyndooh mynsien i ya kiwa boon.
Ka seiñ da pynsñiaw ko leh wa ym em pyrchah ko ya kiwa yaleh kreh na ka thaaiñ u Ynñiawtrep tangwa kat dang em kiwa yaleh na ka District hi, ka Policy toh u lai ko katkam wa da phah da ka Department of Personnel & Administration Reform.
Hajrong ini neiliang u DC da sñiaw yahaap u wei da kular u leh wow e ktien cha ki bor sorkar khnang wow leh yeiwa emkaam.
Ka seiñ da phah khubor ko neibynta kiwa chong chnong ka East Jaiñtia khamtam ki khynroo wym toh u dooh mynsien ki heiyatoh wa i Advertise ya ki kreh khamtam wa mih na ka DSC wow pyndap pyrtuid ki wei wow minot chooh chooh ki sam chaphrang.
