Ka seiñ Hynniewtrep Border Dispute Redressal Forum (HBDRF) da dawa ko na u Chief Electoral Officer (CEO) ka jylla, u FR Kharkongor wow kynthup lang yei pyrtuid ki 43 tylli ki chnong wa em hapoh ka Block-I hapoh ka Electoral Roll.
Ka HBDRF da ong ko deiwa leh yeini daw pyntikna wa kini kiwa chong chnong daw ye ki wow pynyoo yei man ki kam ki tre chnong deiwa emlang leh i pyrtuid i chnong tre ki ha ka EPIC.
Da ong leh wa deiwa leh yeini daw pynsuk manda toh i por wow pynbait pood wei ka HBDRF leh daw lai pynche ko ya kiwa chong chnong yeiwa emkaam u leh ki deiwa pyndap ya ka Form-6 deiwa khana leh yei chnong tre ki.
Ka seiñ da ong ko leh wa hadien wa dep wow leh yeini daw pait lada pdiang namo ym pdiang ka yung krehkaam ya kini ki Form.
Kiwa boon kini ki chnong heini ym em ki hapoh ka Electoral Roll neidaw wa kiwa chong chnong ym em khana ki yei chnong tre ki kamtæ da dooh ki yei yarap na ka sorkar nadooh ki kaam wa yatoh wa i chait i khiah, ka puræ puthi kamjooh ki luti syngkieñ wa kiwi de kiwa toh hok ki wow yoh kam ki bru.
