Jowai: Ka Hynniewtrep Youth Council War Jaiñtia Circle ynnin ka sngi hei yahkhmat u General Secretary u Tohmondiam Mukhim da e ko dei thoh cha ka SDO Amlarem wa neiliang ka chnat krehkaam yong ka wow sñiawbha ki u li e baam e dih cha waroh ki manyung wa dooh wa duk ka War Jaiñtia, kiwa wan thiah kjut wei wan chim dawai na Bethany hospital ha kini ki sngi wada dep.
Neibhah wa kam wa man kattæ kitu ki manyung wa wan na Bethany Hospital da leh Quarantine ki deiwa chong khop hapoh yung kam chibynta wow yada na u COVID-19.
Heiyatoh wa ini, ka seiñ da e yumut ko yaka SDO wow chimkhia ya katai ka bynta neibhah wa ki manyung wa maad yeini i jynjar ym yoh de ki u mih wot tang u lai thied marbaam mardih cha dukan neidaw wym chah ka aiñ yaki u mih.
Kamtæ da kyntu joor ko yaki bor wa toh u pait wow sñiawbha ki wow kyruiñ khmat cha kitai ki bru khnang yow lait na iwon iwon i jia wa sñiawsih deiwa hap chah thngan ki.
Neiliang ka HYC Jaiñtia District won da maham ko ya kiwa chimkabu ha kam kini ki por nadooh kiwa dai dukan kamjooh kiwa dai Wholesaler. Ka seiñ da kyrpaad ko leh yaki paidbah ka ri-loom Jaiñtia wow ya krehlang waka seiñ deiwa chondur yaki dukan ki wym booh (Display) yaki dor ki marbaam mardih hakhmat dukan wa kiwi kiwi ki dor ki tiar ki mata. Ki paidbah leh ye ki wow e yutip deiwa phah yaki dur wa ki chon cha ka seiñ khnang wa ka seiñ u ye ko wow leh ya iwa emkaam.
Discussion about this post