Jowai: Ynnin ka 22 tarik, u sahep sorkar wa da chongngiah uwa jooh ksoh kam u Chief Engineer ka chnat Water Resources Department ka sorkar jylla, u K. Dikyl Phawa da e yarap u ya ki palat spah ki manyung kiwa dooh ha ki le tylli ki dong yong ka chnong Ialong.
U Phawa da mih u chakhmat wow yarap kyrpang ya ki para kur Phawa kiwa em ha katai ka chnong kiwa da chah ktah joor na ka Lockdown wow yaleh pyrchah nei poor u khñiang kjut COVID-19.
U Lehbha Phawa uwi na ki bru rangbah ka kur Phawa ha katai ka chnong da e khublei u ya u Dikyl Phawa uwa da mih chakhmat wow yarap ya ki parakur kiwa dooh kiwa hap wow maad yei eh na i daw u khñiang kjut COVID-19.
“Da em kamwa chispah tam ki manyung kiwa da yoh myntoi na katai ka yarap kawa e da u khoo hadooh 2500 kg”, da ong u Lehbha Phawa.
Neiliang utai u sahep sorkar wa da chongngiah da kyntu u ya kiwa chong chnong wa toh ki u bood ryntih ya ki kyndon yong ka sorkar wa ka chnat i chait i khiah– ka Social Distancing, wow deiñ ya ki Mask wei kamjooh wow lehkhooid deiwa sait ya ki kti boonsien ha ka chi sngi wow yaleh pyrchah ya utai u khñiang kjut.
U Dikyl Phawa da kyntu u leh ya kiwi won ki parakur kiwa em wa dap wow yarap ya kitu ki para kur kiwa em ha kiwi won ki chnong ki thaw.
Discussion about this post