Shillong: Ka Education Cell yong ka Hynniewtrep Youth Council (HYC) ynne ka sngi da lai yachem ki ya u Vice Chancellor ka North Eastern Hills University (NEHU) u S.K. Srivastava yow dawa wow thung kreh da ki tre jylla katwa ye ha ki kaam waphær waphær ha kani ka skurbah.
Hawa yaklam wa kiwa pathai khubor, u Education Secretary ka HYC, u Roykupar Synrem da ong u wa ha i yachem wa u VC da kular u wa ki bor wa pyllai ya ka NEHU daw chong bichaar ki yeni i dawa ka seiñ.
Da pyntip u leh wa da dawa na kiwa pait ya ka NEHU wa em ki kaam wa lait hapoh kani ka skurbah kam ki Professor, Associate Professor, Asst. Professor kiwa da pynmih ha u snem 2016 heiwa ki tre jylla ym em yoh ki. Hajrong ini, u Vice Chancellor da pyntip u wa daw pynmih biang i pynbna deiwa thymme.
U Synrem leh da ong u wa ka seiñ da dawa ko leh na ki tnat waphær waphær hawa pynbna ki wa lait kreh toh u pyrkhat nyngkong ki ya ki tre jylla.
Ka seiñ da pynsñiaw ko leh yei pyrchah hajrong wa jied ya u baar jylla wow thung ya oo kam u Guest Lecturer uwa pass du ya ka M.Phil. wei da kyntait ya ki khynroo khyllood Khasi wa da pyndep ya ka Ph.D. ha ka tnat Geography.
Da pyntip u leh wa neiliang u VC da kular wa da paan pynche u na katai ka tnat wei daw pyndooh kreh noh ya uni u bru.
Heijooh i por u Synrem da ong u wa ka NEHU da toh u pdiang nyngkong ko ya ki khynroo kyllood napoh ka jylla neibhah kamwa man kattæ boon kiwa yoh u puræ toh kiwa na Assam, Manipur, Nagaland hanlada wa i bhah ki tre jylla man i 60% katwa 40% won ya kiwi.
Neiliang u Vice Chancellor da kular wow bichaar yeini waroh wei ka seiñ leh da maham ko wow pynman da ka yakhih lada ym man kaam ki dawa yong ka.
Discussion about this post