Ka Expert Committee kawa da thung da ka sorkar jylla yow pait deiwi ya ka State Reservation Policy, ynne da pynman ko yei pynsñiaw paidbah namo ka Public Hearing ha Conference Hall ka Divisional Soil & Water Conservation Office, Jowai wow ap yeiwa pynsñiaw heiyatoh wa kani ka kaam bhah kreh.
Ha kani ka pynsñiaw paidbah, neiliang ka Jaiñtia Coordination Committee for Reservation Policy (JCCRP) kawa kynthup ya ka Synjuk Waheh Chnong Ri Jaiñtia, JSU, JYF, JNC wa JSM da lai pynsñiaw ki heiyatoh wa i dawa neibynta i pynkylla ya ka Policy.
I daw wa pynman ya kani ka pynsñiaw paidbah ynne ha Jowai toh neidaw wa ha ka sien wa khaddooh wa pynman ya ka ha Shillong boon ym ye ki wow poi neidaw wa sahkut kari ha u sarok Jowai-Shillong.
Neiliang ka JCCRP da thoh ko cha kani ka Committee wow pynman noh ya ka Hearing ha Jowai khnang wow suk ki paidbah na Ri-loom Jaiñtia wow chimbynta.
U Chairman ka JCCRP, u Jersom Shylla uwa man leh u President ka JSU hadien wa kut i pynsñiaw da ong u wa ha ki yalang wa boon wa da pynman da pynsñiaw bait wa emkaam u dawa 80% neibynta ki le jaitbru (Khasi, Jaiñtia wa Garo) ha ka jylla (State Level) katwa ha District won u neh kamjooh hi kawa 80% neibynta kiwa chong chnong ki District.
Da ong u leh wa kani ka Reservation Policy dang man ko du kam ka Policy namo ka rukom krehkaam donhi wei ympu em u man ko kam ka aiñ, kamtæ da dawa wa ya kani ka Policy u pynman aiñ noh ya ka khnang wow suk ka pateiñ wow wan.
Chooh chooh da ong u wa ka Reservation Policy toh u pynkylla ya ka jar jiar heiwa ka bhah kreh wa ka bhah puræ u man ko jar jiar.
Da ong u leh wa ka rai ha khlieh dooh toh ha kti ki 36 ngut ki MLA ka Khasi Jaiñtia wow rai yeini ha yung dorbar chna aiñ ka jylla.
Discussion about this post