Kamwa da tiplang wa ka 14 tarik u Khonchonglad toh ka Children’s Day, kamtæ ka Dorbar Chnong Loomkyrwiang dei sñiaw maya ya ki khynnah wa chong wa sah hapoh u pood u ang ka chnong da pynman ko ka yachemlang wa kyrpang ki khynnah ha Yungwalieh heiwa da embyntalang leh da ki manbei manpa.
Ha ka yalang wa da pynlai da u S.D. Laloo, General Secretary, da kdar yahkhmat da i ngoohblai ngoohsyiem kamjooh leh i klam wa tbian chaphang u Pandit Jawaharlal Nehru da u Elford Laloo.
Katkam ka phang pyrdi (Theme) yong uni u snem wa ong “My Day, My Rights, My Future”, neiliang u Chibor Najiar, Adviser LDC hei klam da ong u ki khynnah toh man ki ka mynried yong ka yung ka sem, ka chnong ka thaw, ka ri wa ka jaitbru kamtæ i kynmoo ya kani ka sngi wa kyrpang yong ki toh ka luti wa biang tam wow pynyoo hakhmat ka pyrthai wa ka dorbar chnong da leh ko yeiwa bha tam neibynta ki khynnah.
Chooh chooh da e u leh i sneiñ i kroo ya ki khynnah wow man kiwa tip yei burom i akor na yung ha lait wei wow kitkhia, u tyrnit tyrna yei kaamram kam ki khynnah skur khnang yow ye u poi cha ka thong yong i naam wei burom ha ki por ki sngi wa daw wan.
Ki yalehke pynka-it kasar, pynkmen pynsñiawbha kiwa ka dorbar chnong da mang kyrpang ko ya ki khynnah ha kani ka sngi toh i saam ya ki tiar, ki baam wa i ah yow Children’s Day Cake iwa daman hei chimbyntalang da waroh ki khynnah.
Discussion about this post