Ka seiñ Jaiñtia National Council (JNC) da pynsñiaw ko yei sñiawsih wa khroo yei chah khyndang yabor wei chah ah ki dieñ kwai wa kiwi ki deiñ ki Khasi wa Jaiñtia kiwa da sah da chi spah snem ha Pahar Line, Cachar District, Assam iwa da jia ha ka 30 tarik u Naisaphra, 2023 iwa da leh da ki bor District, ki pulit wa chnat Forest yong ka Cachar District kam chibynta ka Eviction Drive.
Hajrong ini, ka seiñ da ong ko wa ini pynyoo che wa ka Assam hi ym burom ko yei man tre yei thaw yong ki paradoh parasnaam yong i kiwa da ri da sumaar ya kitai ki thaw la chi spah snem nachwa kiwa da em ha ini i thaw nadooh i por yong ki pharæng wei ymtoh kiwa wan buhai chnong ha kitai ki thaw heiwa da em dei thoh i taar wow pynsakhiat yeini.
Kamtæ da kylli ileh wa ka sorkar Meghalaya nadooh ki warim hadooh kawa katni ym jooh nood ki wow yaklam wa ka sorkar Assam wow e yada ya ki thaw rep thaw sah ki Khasi, ki Jaiñtia kiwa em hapoh Assam khnang yow yoh ki wow man tre yei khyndaw i chyiap.
Ka JNC da kyntu joor ko ya sorkar MDA-II wow chimkhia u yaklam wa ka sorkar India hajrong ini i leh embor ka sorkar Assam ya ki chnong ki Khasi, ki Jaiñtia kiwa em hapoh Assam nadooh chwa i wow yoh laitlooid ka ri India, wei da dawa leh na ka sorkar India wow e yei yada kawa kyrpang neibynta i hok man tre khyndaw yow pynneh pynsah ya ka riti ka dustur yong ki Khynriam, ki Pnar kiwa chong wa sah hapoh Assam.
Ka JNC da kwah ko wow kylli yaka sorkar Assam lada kiwi ki khian paaid kiwa em hapoh Assam yoh ki yei yada wa kyrpang wow man kam ki tre thaw wei wow pynneh pynsah ya ka riti ka dustur yong ki, iyi eh ya ka sorkar Assam wow e ko i jooh i yada ya ki jaitbru ri-loom ka Meghalaya kiwa em hapoh Assam.
Discussion about this post