Ka seiñ Jaiñtia Student Movement (JSM) hadien wa mih khubor wa ki Karbi pyrchah wei da maham ki yei wan yalap Election ki kyrtong MDC cha ka JHADC ha ki chnong ki thaw wa da kam khamtam da ka seiñ KSA toh kiwa dang haap hapoh ka West Karbi Anglong District, neiliang ka JSM da dawa ko na ki Karbi wa ka KSA wow burom yei mon laitlooid ki bru wow jied ya kiwa shynchaar khadar katkam i mon i kwah yong ki ymtoh deiwa wanrah yei pynkulmar hawa lai katkam ka riti synchaar khadar ka ri India waroh kawi.
Ka JSM da klam che ko wa hap u burom yei longbru manbru yong ki jaitbru Karbi wa ki Pnar ha waroh ki liang khnang wow ye u wanrah yei roi i paar wa i suk i saaiñ hapyrdi kini ki ar tylli ki jaitbru ri-loom ka thaaiñ Northeast, tangwa lada ym em i burom wow sñiawthooh mar kylliang, ki bru na Jaiñtia Hills waka JSM ym yohsa ki wow hap lai da kawi ka luti neibynta i bha i miat ki ar jaitbru.
Ka JSM da klam che ko wa ka Labang Nangpyllut wa Pangam Raliang katkam ka parom yong rim namo ka Historical Record haap ko hapoh ka synchaar khadar u Syiem Jaintia tangwa hadien ka Notification 1971 lyngba u Governor ka Assam, da klam che wa da leh yeini du yow suk u pynlai yei kaam synchaar (Effective Governance) heiwa ya ka Labang Nangpyllut wa Pangam Raliang u em ki hapoh ka Mikir Hills ka Karbi Anglong.
Na ini i daw, neiliang ka JSM da dawa joor ko wow e laad ya ka mon laitlooid ya kiwon kiwon ki bru wa chong hapoh ka Labang Nangphyllut wa Pangam Raliang wow jied ki ya kiwa mihkhmat wa kiwa synchaar yong ki neibynta i bha i miat yong waroh ar tylli ki jaitbru.
Puræ leh: Mih i pyrchah na ki Karbi yei wan yalap Election ki kyrtong MDC ka Barato Mukroh Constituency
Discussion about this post