I lai yalap Election MDC ki kyrtong na ka 12-Barato Mukroh Constituency wa kynthup ya u Aiborlang Shadap (NPP) wa ka Banikas Laban (INC) ha ki chnong Mowjem Block-I wa ha chnong Mowluber da poor smat i ha ki rynsan Social Media kamjooh ha ki laad pathai khubor hapoh Karbi Anglong, Assam heiwa da mih i pyrchah joor na ki Karbi deiwa ong wa kani ka thaw toh kawa dang haap hapoh u pood u ang ka West Karbi Anglong Assam.
Neiliang ka Karbi Students Association (KSA) da maham ko lyngba ki laad pathai khubor wa ki Pnar na Meghalaya ym toh wow lai yalap Election ki hapoh Labang Nangphyllut wa Pangam Raliang. Da dawa ki leh na ki bor District ka West Karbi Anglong wa na ka Karbi Anglong Autonomous Council wym chah wow yakhun Election cha ka JHADC neibhah kini ki bru toh kiwa dang em hapoh ka Karbi Anglong wei ka chnong leh toh kawa dang em hapoh ka Assam.
Da pynkynmoo ki leh yei wym lai thap Vote yong ki Pnar cha ki ar tylli ki Election yong ka jylla Assam kitæ ka MAC (Member of Autonomous Council) wa MLA Election. Wei da pyrchah ki leh ya ki Pnar wa em ha Block-I wow lai chimbynta ha ki Election yong ka jylla Meghalaya.
Da ong ki leh wa daw yaklam wa ki Border Committee yong ka West Karbi Anglong yow leh iyi iyi wei wow paitbniah hajrong ini i kaam.
Heiyatoh wa ini, ka Hynñiewtrep Border Disputed Redressal Forum (HBDRF) da ong ko wa hanla ym em iwon iwon i maham na ki seiñ na Karbi tangwa toh u man kiwa syndong wei yatylli yow lait u em ki bru wa chim kabu u wanrah næ pynmih yei kynaad næ i huri hura.
Kamtæ ka HBDRF da ong ko wa daw yachem ko wa u Deputy Commissioner yong ka West Jaiñtia Hills District ha kani ka 10 tarik yow yaklam yeini wei wow dawa leh na ka sorkar wow yaklam smat wa kiwa na Assam khnang wow pynneh pynsah yei chongsuk chongsaiñ ha kani ka thaaiñ.
Discussion about this post