Ka Jaiñtia Students Movement Central Body da pynkynmoo ko ya ka sorkar wow booh ya ka Media Centre ha yung krehkaam u DC ha Jowai neibynta kiwa pathai khubor na Ri-loom Jaiñtia hadien wa da kyrriah ya ka District & Session Court, West Jaiñtia Hills District cha Khliehtyrchi ynnin ka sngi.
Ka seiñ da ong ko wa da dep e dorkhat ko ha u Deputy Chief Minister, u Sniawbhalang Dhar ha ka 14 Naikhynde heiyatoh wa ini.
Katkam wa ong u President ka seiñ, u LS Rymbai, da ong u wa em boon kiwa pathai khubor na Jaiñtia Hills wei da tip wa ka sorkar da booh kamra ko ya kiwa pathai khubor ha Main Secretariat, Shillong kamtæ da dawa leh wow booh kawi ha Jowai.
Da ong u leh wa deiwa kyrriah ya ka District & Session Court, Jowai cha Khliehtyrchi da em thaw wow booh kamra ya kiwa thoh khubor ha ini i por ha yung krehkaam u DC deiwa booh lang ya ki miej, ki chuki, ka Internet wa kiwi de kiwa emkaam kiwa thoh khubor.
Da ong u leh wa ya kani ka kamra toh leh wow kynthup lang ka hapoh ka Mini Secretariat kawa daw chna ha Ladthadlaboh, Jowai.
Discussion about this post