Jowai: Ka Jaiñtia Student Movement (JSM) ynne ka sngi da thoh ko cha u DC ka East Jaiñtia Hills pyrchah ya ka karkhana Abhi Coke Private Limited kawa em harood u sarok bah NH-44 ha i bynta ka chnong Mookhep.
Ka JSM da ong ko wa da yoh ko boon i ood na ki paidbah wa lai luti kamjooh kiwa chong chnong pyrchah ya kani ka karkhana neidaw wa pynmih ko ya i sma wym neh chah de ki bru, da pynkylla bih ko ya ka la-ær wa riñ mynsien ki bru wei da pylliat ko i jakhlia cha ki wah hadooh wym hoi de wow pynemkaam ki bru ya ka um.
Ka seiñ da ong ko leh wa kani ka karkhana ym em bood ko ya ki kyndon wow pynkhooid ya ki jakhlia wa mih na ka deiwa chna ya ki Sewage Treatment Plant kamwa da phah da ka Supreme Court.
Hei yatoh wa ini waroh ka JSM da phah khang ko ha u DC ya kani ka karkhana hapoh ka 16 tarik uni u bnai wei lada ym leh ki ya ini, ka seiñ daw chim ko da ka luti yong ka hi heiwa da yoh ko leh ya i kyrchaan na ki paidbah kani ka thaiñ.
Discussion about this post